हेटौंडा, साल्ट ट्रेडिङ कर्पोरेसन लिमिटेड हेटौँडा शाखाले चाडपर्व लक्षित सुपथ पसल सञ्चालनमा ल्याएको छ । हिन्दूहरूको महान् चाड विजयादशमी, शुभ दीपावली तथा छठ पर्वको अवसरमा हेटौँडा औद्योगिक क्षेत्रमा रहेको कार्यालयबाट सुपथ पसल सञ्चालन गरिएको हो ।
ADVERTISEMENT
गत भदौ ३० गतेदेखि सुरु गरिएको सुपथ पसलमार्फत नून, तेल, पिठो र मैदा बिक्री वितरण भइरहेको शाखा प्रमुख मधुसुदन अधिकारीले जानकारी दिए । उनका अनुसार नेपाल वनस्पति घ्यू उद्योगबाट उत्पादित तेल, खाद्य उद्योगबाट उत्पादित मैदा र पिठोसँगै नून पनि सुपथ मूल्यमा उपलब्ध गराइएको छ।
अधिकारीका अनुसार नूनमा प्रति प्याकेट २ रुपैयाँ, तेलमा प्रति लिटर ७ रुपैयाँ र मैदा तथा पिठोमा प्रति केजी ७ रुपैयाँ छुट दिइएको छ । कर्पोरेसनले नून प्रतिकेजी प्याकेटको खुद्रा मूल्य २४ रुपैयाँ तोकेको छ।
गत वर्षहरूमा कर्पोरेसनले बजार मूल्यभन्दा सस्तो दरमा चिनी पनि उपलब्ध गराउँदै आएको भए पनि यस वर्ष आयात प्रक्रियामा ढिलाइ भएको कारण तत्काल उपलब्ध हुने सम्भावना न्यून रहेको अधिकारीले बताए ।
