हेटौंडा, हेटौँडा उपमहानगरपालिकाको विभिन्न स्थानबाट पाँचजना बालश्रमिकको उद्धार गरिएको छ। अनुगमन टोलीले मङ्गलबार उपमहानगर क्षेत्रभित्रका बालश्रमिक प्रयोग हुन सक्ने विभिन्न होटेल, ग्यारेजलगायतका स्थानमा अनुगमन गरेको थियो।
ADVERTISEMENT
अनुगमन समिति संयोजक २ नं वडा सदस्य एवम् नगर बाल अधिकार समिति सदस्य सुरज बर्तौला, श्रम तथा रोजगार कार्यालय प्रमुख रुद्र नारायण शाह र अनित रसाईली, जिल्ला प्रशासन कार्यालयका दिपक पौडेल, जिल्ला प्रहरी कार्यालयकी लालमाया बाईवा, सिबिन बाल हेल्पलाईनका प्रबन्धक झविन्द्र ज्ञवाली, समाजसेबी ललिता ठिके र बालमैत्री नगर सहजकर्ता सपना ढुङ्गानाको टोलीले गरेको अनुगमनका क्रममा उपमहानगरपालिकाको मेनरोड, थाहा मार्गबाट पाँचजना बालश्रमिकलाई उद्धार गरिएको हो।
अनुगमन टोलीले आर एण्ड आर ट्रेडर्सबाट १३ वर्षीय बालकको उद्धार गरेको छ । यस्तै मेनरोडमा रहेको विश्वकर्मा वकर्सपबाट १५ वर्षीय बालक, थाहा मार्गमा रहेको न्यु आशिका मेकानिकल वर्कसपबाट १५ वर्षीय बालक र थाहा मार्गमै रहेको न्यु विश्वकर्मा मोटर वर्कसपमा कार्यरत १४ वर्ष र १५ वर्षीय बालकलाई उद्धार गरेको हो । उद्धार गरिएका बालकहरुलाई सिबिन बाल हेल्पलाईनमा राखी श्रम तथा रोजगार कार्यालय मार्फत जरिवाना गराई पारिवारिक पुनर्स्थापना गराईने सिबिन बाल हेल्पलाईनका प्रबन्धक झविन्द्र ज्ञवालीले जानकारी दिए । हेटौंडा उपमहानगरपालिकाको विभिन्न वडा बालमैत्री स्थानीय शासनयुक्त वडा घोषणा भइरहँदा पनि बालश्रम भने अझै रोकिएको छैन ।
