हेटौंडा, बागमती प्रदेश क्रिकेट संघको आयोजनामा जारी बागमती प्रदेशस्तरीय प्रधानमन्त्री कप क्रिकेट छनोट प्रतियोगितामा मकवानपुरका क्रिकेटर शुभ कंशाकारले शतक प्रहार गरेका छन् । आज भएको चितवन विरुद्धको खेलमा कंशाकारले ९६ बलको सामना गर्दै ११३ रन बनाए । उनले १० चौका र ७ छक्का प्रहार गरे ।
ADVERTISEMENT
टस हारेर ब्याटिङको निम्तो पाएको मकवानपुरले ४३ ओभरमा ९ विकेटको नोक्सानीमा २३६ रनको योगफल तयार पार्यो । मकवानपुरका लागि गौरभ खड्काले ३० रन र सक्षम बास्ताकोटीले पनि ३० रन बनाउन सफल भए । २३७ रनको लक्ष्य पछ्याएको चितवन २२८ रनमा अलआउट बन्यो । चितवनका गौतम केसीले ४६ रन, रोविन शर्माले ४४ रन, प्रशान्त महतले ४२ रन जोड्न सफल भए । मकवानपुरका रामनरेश गिरीले ३ विकेट, असिम श्रेष्ठ, साकार गुजरेल र विशाल फुयाँलले समान २ विकेट हात पार्न सफल भए । प्रतियोगितामा मकवानपुर ८ रनले विजयी भएको छ ।
चितवनस्थित गौतमबुद्ध अन्तर्राष्ट्रिय क्रिकेट रंगशालामा भएको समूह चरणको तीन वटै खेलमा जीत निकाल्दै मकवानपुर सेमीफाइनल प्रवेश गरेको हो । प्रतियोगितामा शतक प्रहार गरेका शभ कंशकार खेलको म्यान अफ द म्याच घोषित भए ।
