हेटौँडा, हेटौंडा उपमहानगरपालिका वडा नम्बर ४ कार्यालयको आयोजनामा सम्पन्न बृहत् निःशुल्क स्वास्थ्य परीक्षण शिविर शनिबार सम्पन्न भएको छ। नेपाल हृदयरोग निवारण प्रतिष्ठान मकवानपुरका वरिष्ठ उपाध्यक्ष ध्रुव भुजेलको अध्यक्षतामा सम्पन्न कार्यक्रममा बागमती प्रदेश सरकारका स्वास्थ्य मन्त्री माननीय किरण थापाको प्रमुख आतिथ्यता रहेको थियो।
ADVERTISEMENT
कार्यक्रमलाई सम्बोधन गर्दै प्रमुख अतिथि स्वास्थ्य मन्त्री किरण थापाले स्वास्थ्य सेवा नागरिकको आधारभूत अधिकार भएको उल्लेख गर्दै सरकारले स्वास्थ्य सेवालाई सर्वसाधारणको पहुँचमा पुर्याउन निरन्तर काम गरिरहेको बताउनुभयो। उहाँले यस्ता शिविरहरूले रोगको समयमै पहिचान गरी उपचारमा सहजता ल्याउने तथा स्वास्थ्यप्रति जनचेतना अभिवृद्धि गर्ने विश्वास व्यक्त गर्नुभयो। त्यसैगरी वडा अध्यक्ष नवीन सिग्देलले वडा कार्यालयले नागरिकको स्वास्थ्य, शिक्षा र सामाजिक विकासलाई प्राथमिकतामा राख्दै विभिन्न जनमुखी कार्यक्रम सञ्चालन गर्दै आएको बताउनुभयो। उहाँले शिविरमा उल्लेखनीय सहभागिता जनाई स्वास्थ्य परीक्षण गराएकोमा सम्पूर्ण नागरिकप्रति आभार व्यक्त गर्नुभयो।
कार्यक्रममा प्रदेशसभा सदस्य एकलाल श्रेष्ठ, हेटौंडा उपमहानगरपालिका वडा नं. ४ का अध्यक्ष नवीन सिग्देल, मदन भण्डारी स्वास्थ्य विज्ञान प्रतिष्ठानका रजिस्ट्रार भीमसागर गुरागाईं, टोल विकास संस्था नगर समन्वय समिति, हेटौंडाका अध्यक्ष ध्रुव प्रसाद अधिकारीलगायतको विशेष आतिथ्यता रहेको थियो। शिविरमा हेटौंडा–४ तथा आसपासका क्षेत्रका ६ सयभन्दा बढी नागरिकले निःशुल्क स्वास्थ्य सेवा लिएका छन्।
शिविरमा मुटुरोग, स्त्रीरोग तथा क्षयरोगसम्बन्धी विशेषज्ञ सेवा, भिडियो एक्स–रे, ईसीजी, इको परीक्षण, छातीको एक्स–रे, पीएफटी (दम परीक्षण), सुगर तथा लिपिड प्रोफाइल परीक्षण, महिलाको पाठेघर तथा पाठेघरमुखको क्यान्सर परीक्षण, सामान्य स्वास्थ्य परीक्षण तथा परामर्श सेवा प्रदान गरिएको थियो। आवश्यक परेका बिरामीहरूलाई निःशुल्क औषधि वितरण समेत गरिएको आयोजकले जनाएको छ।
कार्यक्रम व्यवस्थापक तथा टोल विकास संस्था नगर समन्वय समिति, हेटौंडाका अध्यक्ष ध्रुव प्रसाद अधिकारीले स्वस्थ नागरिक नै समृद्ध समाजको आधार भएको उल्लेख गर्दै समुदायस्तरमा स्वास्थ्य सचेतना अभिवृद्धि गर्न यस्ता कार्यक्रमलाई आगामी दिनमा पनि निरन्तरता दिइने बताउनुभयो। उहाँले शिविर सफल बनाउन सहयोग गर्ने सम्पूर्ण संस्था, चिकित्सक, स्वास्थ्यकर्मी, स्वयंसेवक, सञ्चारकर्मी तथा सहभागी नागरिकप्रति आभार व्यक्त गर्नुभयो।
शिविरमा विशेषज्ञ चिकित्सकहरूको टोली, स्वास्थ्यकर्मी, स्वयंसेवक तथा स्थानीय जनप्रतिनिधिहरूको सक्रिय सहभागिता रहेको थियो। आयोजकका अनुसार यस्ता शिविरहरूले समुदायका नागरिकलाई सहज, सुलभ र गुणस्तरीय स्वास्थ्य सेवा उपलब्ध गराउन महत्वपूर्ण योगदान पुर्याउने विश्वास लिइएको छ।
आयोजक संस्थाहरूले भविष्यमा पनि यस्ता सामाजिक तथा स्वास्थ्यसम्बन्धी कार्यक्रमलाई निरन्तरता दिने प्रतिबद्धता जनाएका छन्। कार्यक्रम नेपाल हृदयरोग निवारण प्रतिष्ठानको सह–आयोजनामा, मदन भण्डारी स्वास्थ्य विज्ञान प्रतिष्ठानको विशेष सहयोग तथा टोल विकास संस्था नगर समन्वय समिति, हेटौंडाको व्यवस्थापनमा सम्पन्न भएको हो।
