बाँझो जमिनमा खेती गर्न अनुदान कार्यक्रम

हेटौंडा, बागमती प्रदेशमा जमिन बाँझो राखेका जग्गा धनीलाई जमिनमा खेती गरेबापत प्रोत्साहन दिइने भएको छ । बागमती प्रदेशका कृषि तथा पशुपन्छी विकास मन्त्रालयका सूचना अधिकारी अनुप अधिकारीका अनुसार खेतीयोग्य बाँझो जमिनमा खेती गर्न प्रोत्साहनका लागि अनुदान कार्यक्रम ल्याइएको हो ।

प्रदेश सरकारले बाँझो जमिनमा खेती प्रोत्साहन गर्ने करार कार्यविधि पनि स्वीकृत गर्दै कार्यक्रमका लागि १ करोड ५० लाख रुपैयाँ बजेटको व्यवस्था गरेको छ । मन्त्रालयले १५ चैतभित्र बाँझो जमिन करारमा दिन ईच्छुक व्यक्ति र सो जमिनमा खेती गर्न चाहने किसानलाई सूचीकृत हुन सूचना निकालेको छ । सम्झौता भएपछि बाँझो जमिन करारमा दिन चाहने किसानलाई मन्त्रालयले प्रतिरोपनी वार्षिक २ हजार रुपैयाँ उपलब्ध गराउने छ । करारमा जग्गा दिन चाहनेले कम्तीमा २ रोपनी बाँझो जमिन कम्तीमा ५ वर्षका लागि उपलब्ध गराउनु पर्नेछ भने करारमा लिन चाहनेले पनि कम्तीमा २ रोपनी बाँझो जमिन कम्तीमा ५ वर्षका लागि लिनुपर्नेछ ।

मन्त्रालयको पछिल्लो तथ्यांकअनुसार बागमती प्रदेशमा ३८ हजार ६ सय ३५ हेक्टर खेतीयोग्य जमिन बाँझो छ ।