‘मोडल’ नक्सामा उत्कृष्ट दुई समूह छनौट

हेटौंडा, नवोदय सामाजिक क्लवको आयोजनामा शुक्रबार भएको ‘मोडल’ नक्सा कार्यक्रममा उत्कृष्ट दुई समूह छनौट भएका छन् । ७ वटा विभिन्न समूहले नक्साको तयार पारी प्रस्तुती दिएकोमा दुई वटा समूहलाई छनौट गरिएको नवोदय शिशु सदन अङ्ग्रेजी माध्यमिक विद्यालयका सामाजिक विषयका शिक्षक तथा क्लवका इन्चार्ज सरोज पुडासैनीले जानकारी दिए ।

विद्यालयका प्राङ्गणमा स्टल राखी विद्यार्थीहरुले नक्साको प्रस्तुती दिएका थिए । प्रस्तुतीको आधारमा पृथ्वीको संरचनाको समूह र विश्वको नक्साको समूहलाई उत्कृष्ट छनौट गरिएको हो । सामाजिक शिक्षक संघ मकवानपुरका अध्यक्ष भोगेन्द्र लुइटेल, वरिष्ठ उपाध्यक्ष बालकुमार श्रेष्ठ र नवोदय विद्यालयका सामाजिक विषयका शिक्षक रविन्द्र कार्कीले निर्णायकको भूमिका निर्वाह गरेका थिए ।

नवोदय सामाजिक क्लवका अध्यक्ष निर्भज्ञ ज्ञवालीको अध्यक्षतामा भएको कार्यक्रममा सामाजिक शिक्षक संघ(सोस्टा) मकवानपुरका अध्यक्ष भोगेन्द्र लुइटेलको प्रमुख आतिथ्यता रहेको थियो । कार्यक्रममा प्रमुख अतिथि रहेका लुइटेलले नवोदय विद्यालयमा गठन भएको सामाजिक क्लवले गरेको कामको प्रशंसा गर्दै जिल्लामा रहेको सामूदायिक तथा संस्थागत विद्यालयले सामाजिक क्लव गठन गर्नुपर्ने आवश्यक रहेकोमा जोड दिएका थिए ।