महासंघद्वारा बन्जाराको बिषयमा निष्पक्ष छानवीन माग

हेटौंडा,नेपाल पत्रकार महासंघ मकवानपुरका साधारण सदस्य एवम् बागमती एक्सप्रेस साप्ताहिकका पत्रकार इन्द्रप्रसाद बन्जारा (रमेश) लाई लगाइएको आरोपको बिषयमा निष्पक्ष छानवीन गर्न पत्रकार महासंघले माग गरेको छ ।

नेपाल पत्रकार महासंघ बागमती प्रदेश समिति र मकवानपुर शाखाले घटना तथा आरोपको सत्यतथ्य छानवीन गर्न माग गरेको हो । प्रदेश महासचिव कृष्ण सारु मगर र मकवानपुर अध्यक्ष मणिराज गौतमले बिहीबार जारी गरेको विज्ञप्तीमा पत्रकार बन्जारालाई लगाइएको आरोपको विषयमा निष्पक्ष छानवीन गर्न सम्वन्धित पक्षसंग माग गरिएको छ । बन्जारालाई एक महिलाले बलात्कारको आरो लगाएकी छिन् ।

सत्यतथ्य छानवीन गरी दोषी उपर कडा कारबाही गर्न माग गरिएको छ । यस घटनामा सिसीटिभी फुटेजमा आरोप लगाइएको भन्दा फरक प्रकृतिको घटना देखेपछि महासंघसहित राजनीतिक दल र अन्य संघसंस्थाले विशेष चासो दिएका छन् । बन्जारालाई जिल्ला अदालतबाट म्याद थप गरी प्रहरी कार्यालयमा राखेर अनुसन्धान गरिरहेको छ । यस घटनामा दोहोरो छानवीन गर्नका लागि महासंघले माग गरेको छ । केही दिनयता विभिन्न सञ्चार माध्यममा यस घटनासँग सम्बन्धित विषयमा उनलाई फसाउने प्रयास गरेको आशंकासहित समाचार तथा सिसीटिभी फुटेजहरु प्रकाशन र प्रशारण भइरेहेकाले कसैको दवाव र प्रभावमा नपरी घटनाको निष्पक्ष र दोहोरो छानविन गर्न माग गरेको हो ।

बुधबार राष्ट्रिय स्वतन्त्र पार्टी मकवानपुरले पनि प्रहरी कार्यालयमा ज्ञापनपत्र बुझाउँदै बदलाभाव राखेर फसाउन खोजिएको देखिएकोले निष्पक्ष छानवीनको मागसहित षड्यन्त्र गर्नेलाई समेत अनुसन्धान गरी कारबाहीको दायरामा ल्याउन माग गरेको थियो ।