हेटौंडा, हेटौंडा–४ मा रहेको नवोदय शिशु सदन अङ्ग्रेजी माध्यमिक विद्यालयमा कृष्ण जन्माष्टमी पर्व मनाएको छ । विद्यार्थीलाई प्रयोगात्मक हुने हिसाबले सिकाईका लागि कृष्ण जन्माष्टमी पर्वको अवसरमा विविध कार्यक्रम आयोजना गरिएको विद्यालयले जनाएको छ ।
पूर्व प्राथमिक तह तथा प्राथमिक तहमा अध्ययन गर्ने विद्यार्थीहरू कृष्ण र राधाको भेषमा सजिएर विद्यालय आउनुका साथै विद्यार्थीहरूले घैटो फुटाउने खेल, भजनमा नृत्य गर्नुका साथै शिक्षिकाहरुले कृष्ण जन्माष्टमी पर्वको बारेमा जानकारी गराएका थिए । विद्यालयले पढाई सँगसँगै बाहिरी ज्ञानलाई पनि उतिकै प्राथमिकतामा राखेको र हरेक चाडपर्व मनाउने परम्परालाई पनि विद्यालयबाट नै सिकाउने गरेको विद्यालयका प्रधानाध्यापक मनोज थिङले जानकारी दिए ।
धार्मिक पर्वका बारेमा विद्यार्थीहरूलाई जानकारी गराउने उद्देश्यले कार्यक्रम आयोजना गरिएको हो । पूर्व प्राथमिक तहको संयोजक अनिता गौतमले भनिन् –‘विद्यार्थीको गतिविधिमा अभिभावकले राम्रो सहयोग गर्नुभएको छ । आगामी दिनमा पनि विभिन्न पर्वमा अन्य कार्यक्रमहरु सञ्चालन गर्ने छौँ ।’
