हेटौंडा, हेटौंडामा रहेको होटलमा मृत अवस्थामा फेला परेकी एलिसा न्यौपानेको हत्याको मुख्य आरोपीलाई मकवानपुर प्रहरीले सोमबार पक्राउ गरेको छ ।
हेटौंडा १० बसपार्कस्थित रत्ना होटलमा हेटौंडा ११ की न्यौपानेलाई हत्या गरी फरार रहेका ३२ वर्षीय समिर खान भनिने चाँद खाँ पैठानलाई सोमबार साँझ हेटौंडा ५ लट्टिनाथ मन्दिर क्षेत्रबाट पक्राउ गरिएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक लक्ष्मी भण्डारीले जानकारी दिए ।
उनलाई हिरासतमा राखी थप अनुसन्धान भईरहेको उनले बताए ।
घटनामा संलग्न रहेको आरोपमा प्रहरीले भदौ १५ गते शनिबार समिरका ५५ वर्षीय आमा सैरुन खान, २६ वर्षीय श्रीमति रविना खातुन, ५६ वर्षीय ससुरा लालबाबु खाँ पैठान र ३० वर्षीय जेठान फैयाज अहमदलाई नियन्त्रणमा लिई अनुसन्धान जारी राखेको थियो ।
