हेटौंडा, नेपाल सितोरियो कराते संघ जिल्ला कार्य समिति मकवानपुरको आयोजनामा प्रथम जिल्ला स्तरीय मेयर कप खुल्ला कराते प्रतियोगिता हुने भएको छ । आगामी मंसिर १४ र १५ गते हेटौंडामा आयोजना हुन लागेको कराते प्रतियोगिताको बारेमा आयोजकले बुधबार पत्रकार सम्मेलनको आयोजना गरी जानकारी दिईएको हो ।
ADVERTISEMENT
‘नेपाल सितोरियो कराते संघ जिल्ला कार्य समितिको आयोजनामा मकवानपुर जिल्लामा प्रथम जिल्ला स्तरीय मेयर कप खुल्ला कराते प्रतियोगिता आयोजना गर्न लागेका छौँ ।’ संघका अध्यक्ष दिपकबहादुर लामाले भने –‘दुई दिन आयोजना हुने प्रतियोगिताको पहिलो दिन उद्घाटन समारोह, सम्पूर्ण काता प्रतियोगिता र महिलाको कुमुते प्रतियोगिता हुनेछ भने दोस्रो दिन पुरूषको कुमुते प्रतियोगिताका सम्पूर्ण खेल, महिला र पुरुषको फाइनल प्रतियोगिता तथा कार्यक्रम समापन हुनेछ ।’ तौल समूह अन्तर्गत पुरुषतर्फ २५, ३०, ३५, ४२, ४७, ५२, ५७, ६२, ६७ केजी र महिलातर्फ २५, ३०, ३५, ४०, ४५, ५०, ५५ र ६० केजी तौल समूहमा प्रतिस्पर्धा गर्ने छन् ।
मकवानपुर जिल्लामा रहेका १५ वटा डोजोका ३ सय १५ जना खेलाडीले विभिन्न तौल समूहमा प्रतिस्पर्धा गर्ने छन् । जसमा एक डोजोबाट कुमिते पुरुष ९ जना, कुमिते महिला ८ जना, काता महिला र पुरुष २ जना, टिम कोच र मेनेजर गरी २ जना गरी २१ जनाले सहभागिता जनाउने अध्यक्ष लामाले बताए । आगामी वर्ष पनि प्रतियोगितालाई निरन्तरता दिनेमा उनले प्रतिबद्धता व्यक्त गरे ।
आयोजकले प्रत्येक खेलाडीलाई खाना र बस्नको व्यवस्था मिलाएको जनाएको छ । प्रतियोगिताको लागि लाइसेन्स होल्डर स्थानीय १० जना र बाहिरका २० जना गरी ३० जना रेफ्रीले निर्णायकको भूमिका निर्वाह गर्ने उनले जानकारी दिए ।
प्रतियोगितामा स्वर्ण, रजत र कास्य जित्ने खेलाडीलाई मेडल र प्रमाणपत्र प्रदान गरिने छ भने उत्कृष्ट खेलाडीलाई नगदको व्यवस्था गरेको आयोजकले जनाएको छ । प्रतियोगिताको लागि हेटौंडा उपमहानगरपालिकाले २ लाख रुपैयाँ सहयोग गर्नेछ भने बुद्ध स्नोकर हाउस हेटौंडा–४ र एस वान स्नोकर क्लव हेटौंडा १० प्रायोजक रहेको छ । पत्रकार सम्मेलनमा आयोजक समितिका पदाधिकारीहरूको उपस्थिती रहेको थियो ।
