आजबाट आठौ संस्करणको विनयबाबु स्मृति भलिबल प्रतियोगिता सुरु

हेटौँडा, आजबाट उत्तरी मकवानपुरको थाहा नगरपालिकामा विनयबाबु स्मृति भलिबल प्रतियोगिता सुरु भएको छ । प्रतियोगितामा जिल्लाका १२ वटा टिमले सहभागिता जनाएका छन् । लिग चरणमा खेल तालिका अनुसार आज पहिलो खेल उन्यूचौर विरुद्ध तमु बहुउद्देश्यीय बीच हुने आयोजकले जनाएको छ ।

विनयबाबु स्मृति प्रतिष्ठानको आयोजनामा थाहा नगरपालिका मुख्य प्रायोजक र वडा नं. २ कार्यालयको सहयोगमा कार्तिक ४ गतेसम्म प्रतियोगिता सञ्चालन हुने प्रतिष्ठानका अध्यक्ष शंकर कार्कीले जानकारी दिए । प्रतियोगिता वडा नं. २ को फाँटबजारमा हुनेछ । प्रतिष्ठानले दिपावलीको अवसर पारेर विगत ७ वर्षदेखि प्रतियोगिताको आयोजना गर्दै आएको छ ।

प्रतियोगिताको उपाधि विजेता टिमले ५५ हजार ५ सय ५५ रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले २८ हजार ८ सय ८८ रुपैयाँसहित शिल्ड, मेडल तथा प्रमाणपत्र प्राप्त गर्नेछ ।

तृतीय र चौथो हुने टिमलाई पनि नगद रुपैयाँसहित मेडल तथा प्रमाणपत्र प्राप्त गर्नेछ भने विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ । गत वर्षको सातौँ र छैटौँ संस्करणमा मङ्गलेश्वर युवा क्लबले लगातार उपाधि जितेको थियो । आठौँ संस्करणको उपाधी पनि मंग्लेश्वरले जितेमा रनिङ शिल्ड कब्जा गर्नेछ ।