मकवानपुरमा लागुऔषधसहित अटो चालक पक्राउ

हेटौँडा, मकवानपुरमा ठूलो परिमाणको लागुऔषधसहित एक अटो चालक पक्राउ परेका छन्। आज बिहान राप्तिरोडबाट थानाभर्‍याङतर्फ गइरहेको बा.प्र. ०३–००१ ह ०१२६ नम्बरको अटो प्रहरी टोलीलाई देख्नेबित्तिकै भागेपछि शंका उत्पन्न भई प्रहरीले पछ्याइ खोजतलास गरेको थियो।

जिल्ला प्रहरी कार्यालय मकवानपुरबाट खटिएको टोलीले पछ्याउँदै जाँदा अटोलाई हेटौँडा उपमहानगरपालिका–१, तरकारी बजार क्षेत्रमा फेला पारेर चालकलाई नियन्त्रणमा लिएको हो। पक्राउ परेका चालक हेटौँडा–१३ बसोबास गर्ने २७ वर्षीय सोनम मोक्तान रहेको प्रहरीले जनाएको छ।

मोक्तानको रितपूर्वक खानतलासी गर्दा अटोभित्र लुकाइ राखिएको अवस्थामा लागुऔषध ट्रामाडोलका १५ हजार ९६० क्याप्सुल फेला पारेको प्रहरीले बताएको छ। प्रहरीले लागुऔषधसहित अटो समेत बरामद गरी मोक्तानलाई नियन्त्रणमा लिएको छ।
नियन्त्रणमा रहेका मोक्तानविरुद्ध लागुऔषधसम्बन्धी मुद्दामा थप अनुसन्धान र कानूनी कारबाही अघि बढाइएको जिल्ला प्रहरी कार्यालय मकवानपुरले जनाएको छ।