राष्ट्रिय पर्या कविता प्रतियोगिताका लागि उत्कृष्ट १० कविता छनौट

हेटौँडा, राष्ट्रिय पर्या कविता प्रतियोगिताका लागि उत्कृष्ट १० कविता तथा कविहरूको नामावली सार्वजनिक गरिएको छ। साहित्य सङ्गम मकवानपुरको आयोजनामा हुन लागेको प्रतियोगिताका लागि सङ्गमले १० वटा कविता र कविको सूची प्रकाशन गरेको हो।

प्रतियोगिताका लागि १६४ वटा कविता प्राप्त भएका थिए। तीमध्येबाट अन्तिम चरणको प्रतियोगिताका लागि १० वटा कविता छनोट गरिएको साहित्य सङ्गम मकवानपुरका अध्यक्ष डीबी बर्तौलाले जानकारी दिनुभयो। उहाँका अनुसार प्रतियोगितामा प्रथम, द्वितीय र तृतीय हुने कविलाई क्रमशः ३० हजार, २० हजार र १० हजार रुपैयाँ नगद पुरस्कार प्रदान गरिनेछ। साथै चौथो र पाँचौँ स्थान हासिल गर्ने कविलाई प्रोत्साहनस्वरूप जनही ५/५ हजार रुपैयाँ प्रदान गरिनेछ।

अन्तिम चरणमा छनोट भएका कविहरूले प्रतियोगितामा भाग लिनेछन्। वाचनका लागि छनोट भएका कवि तथा कविताहरूमा सुनसरीका किरन सिवाको मौन प्रकृति, मकवानपुरका किशन पौडेलका दोहन, तनहुँका नरोत्तम श्रेष्ठको बिउको रक्तिम घोषणापत्र, सिन्धुलीका निरुपम श्रेष्ठका हरियो बिद्रोह, कास्कीका मदन घिमिरेका एक आरोहीको डायरी, कैलालीका मोहित जोशीका समयको अन्त्यको किनारमा उभिएर, काठमाडौका यशोदा अधिकारीका धर्तिको विघटन, धादिङका राजु झल्लुप्रसादका तर, मकवानपुरका सुवास सजलका मौनधारण र लमजुङका सुरेशचन्द्र घिमिरेका प्रकृति र जीवन रहेका छन् ।

उत्कृष्ट १० मा पर्न सफल भएका कविहरुबीच पुस २६ गते अन्तिम चरणको प्रतियोगिता हेटौँडामा हुने संगमका उपाध्यक्ष तथा कार्यक्रम संयोजक मनोज पोखरेलले जानकारी दिए ।