हेटौंडा, चैनपुर जेसीज मनहरीको आयोजनामा मकवानपुरको मनहरी गाउँपालिका ४ मसिनेस्थित गोलघरमा जारी चौथो संस्करणको चैनपुर जेसीज मनहरी कप खुला फुटबल प्रतियोगितामा साविक उपविजेता पटिहानी इभेन्ट्स क्वाटरफाइनल प्रवेश गरेको छ । मंगलबार भएको खेलमा पहिलो संस्करणको विजेता समेत रहेको बागमती प्रदेश प्रहरी गणलाई ३-१ गोलले हराउँदै पटिहानीले क्वाटरफाइनलमा स्थान बनाएको हो ।
ADVERTISEMENT
खेलमा पटिहानीले नै सुरुवाती अग्रता लिएको थियो । सातौं मिनेटमा विकास दर्लामी मगरको गोल मार्फत पटिहानीले अग्रता लिएको थियो । दोस्रो हाफको आठौं मिनेटमा प्रहरीका रामकृष्ण राउतले उत्कृष्ट गोल गर्दै खेललाई बराबरीमा ल्याए । दोस्रो हाफको २५ औं मिनेटमा सामुयल सुनारको गोलमार्फत पटिहानीले पुनः अग्रता लियो । त्यसको ५ मिनेटपछि दर्लामीले नै गोल गर्दै खेललाई ३-१ को अवस्थामा पुर्याएका हुन् । खेलको म्यान अफ द म्याच पटिहानीका लागि २ गोल गरेका दर्लामी नै घोषित भए ।
जारी प्रतियोगितामा बुधबार २ खेल हुनेछ । पहिलो खेल खरंगा एफसी र माथिल्लो मसिने एफसीको बीचमा हुनेछ भने दोस्रो खेलमा हाँडीखोला यूथ क्लव र मनहरी ४ नम्बर वडाको बीचमा हुनेछ । यहि २६ गतेसम्म सन्चालन हुने प्रतियोगितामा मकवानपुर र चितवनका गरी १२ क्लवको सहभागिता रहेको छ ।
प्रतियोगिताको विजेताले १ लाख एक हजार १११ रुपैयाँ तथा उपविजेताले ५१ हजार १५१ रुपैयाँसहित ट्रफी र प्रमाणपत्र प्राप्त गर्नेछन् । यस्तै सर्वोत्कृष्ट खेलाडीले १० हजार तथा अन्य विधागत उत्कृष्टले जनही ५ हजार रुपैयाँसहित ट्रफी र प्रमाणपत्र प्राप्त गर्ने प्रतियोगिता संयोजक चैनपुर जेसीज मनहरीका कार्यकारिणी उपाध्यक्ष नवराज रिजालले जानकारी दिए । चैनपुर जेसीज मनहरीको आयोजना तथा मनहरी गाउँपालिका ४ नम्बर वडा कार्यालयको मुख्य प्रायोजनमा प्रतियोगिता भएको हो ।
,,
