हेटौँडा, हेटौँडा उपमहानगरपालिका–१५ को आयोजनामा ‘वडा अध्यक्ष कप–२०८३ राष्ट्रिय स्नुकर च्याम्पियनसिप (टप–१६)’ मंगलबारदेखि सुरु भएको छ। हेटौँडा–४ स्थित लियम स्नुकर हाउसमा आयोजित विशेष समारोहबीच हेटौँडा उपमहानगरपालिकाका उपप्रमुख राजेश बानियाँले प्रतियोगिताको उद्घाटन गर्नुभएको हो।
ADVERTISEMENT
हेटौँडा–१५ खेलकुद विकास समितिका अध्यक्ष एवं प्रतियोगिताका संयोजक प्रितम रानाको सभाध्यक्षतामा भएको उद्घाटन समारोहमा उपप्रमुख बानियाँले रिबन काट्नुका साथै स्नुकर बल प्रहार गरेर प्रतियोगिताको शुभारम्भ गर्नुभयो।
उद्घाटन समारोहलाई सम्बोधन गर्दै उपप्रमुख बानियाँले स्नुकर खेलको विकास र खेलाडीको क्षमता अभिवृद्धिका लागि स्थानीय सरकारले आवश्यक सहयोग गर्नुपर्ने बताउनुभयो। उहाँले हेटौँडा उपमहानगरपालिकाको आगामी विशेष अधिवेशनमा स्नुकर खेलाडी तथा शुभचिन्तकहरूसँग छलफल गरी राष्ट्रियस्तरको स्नुकर च्याम्पियनसिप सञ्चालनका लागि नीतिगत रूपमा बजेट विनियोजन गर्ने प्रतिबद्धता व्यक्त गर्नुभयो।
ADVERTISEMENT
स्नुकर खेल धनी वर्गले मात्र खेल्ने खेल हो भन्ने पुरानो सोचमा परिवर्तन हुँदै गएको उल्लेख गर्दै उहाँले पछिल्लो समय देशका विभिन्न स्थानमा युवामाझ यस खेलको लोकप्रियता बढ्दै जानु सकारात्मक भएको बताउनुभयो। देशका विभिन्न ठाउँबाट प्रतियोगितामा सहभागी हुन हेटौँडा आएका खेलाडीलाई स्वागत गर्दै उहाँले खेलकुदले खेलाडीको व्यक्तिगत पहिचानसँगै देशको प्रतिष्ठा बढाउन महत्त्वपूर्ण भूमिका खेल्ने धारणा राख्नुभयो।
कार्यक्रममा हेटौँडा–१५ का वडा अध्यक्ष सुनिल मोक्तानले प्रतियोगितामा सहभागी देशभरका खेलाडीलाई सफलताको शुभकामना दिनुभयो। उहाँले स्नुकर खेलमा धैर्यता, एकाग्रता र अनुशासन आवश्यक पर्ने उल्लेख गर्दै यस खेलप्रति समाजमा रहेको नकारात्मक धारणालाई परिवर्तन गरी सकारात्मक रूपमा प्रवर्द्धन गर्नुपर्ने बताउनुभयो। प्रतियोगिताले खेलाडीको प्रतिभा पहिचान गर्न र स्नुकर खेलको विकासमा योगदान पुर्याउने उहाँको विश्वास थियो।
उद्घाटन समारोहमा हेटौँडा–१५ का वडा सदस्य सिंहबहादुर लो, प्रतियोगिताका निर्णायक टिकालाल श्रेष्ठ र विश्व कार्कीलगायत स्थानीय बासिन्दा, खेलप्रेमी तथा सञ्चारकर्मीहरूको उपस्थिति रहेको थियो।
प्रतियोगिताअन्तर्गत मंगलबार पोखराका परिवेश रेग्मी र धनगढीका रोहित क्षेत्रीबीच तथा पाल्पाका कुडुल श्रेष्ठ र काठमाडौँका विनोद श्रेष्ठबीच पहिलो चरणका खेल सुरु भएको आयोजकले जनाएको छ।
स्थानीय तहको पहलमा आयोजना गरिएको यस प्रतियोगिताले स्नुकर खेलको प्रवर्द्धन, खेलाडीबीच प्रतिस्पर्धात्मक क्षमता अभिवृद्धि तथा राष्ट्रियस्तरमा हेटौँडाको खेलकुद पहिचान स्थापित गर्न सहयोग पुग्ने अपेक्षा गरिएको छ।
