हेटौंडा, बसामाडी जेसीजको आयोजनामा सञ्चालन हुँदै आएको लक्ष्मीमाया बज्राचार्य स्मृति जिल्लास्तरीय खुला रनिङशिल्ड भलिबल प्रतियोगिताको यस बर्षको संस्करण यही मंसिर २८ गतेबाट हुने भएको छ । २० औं संस्करणको भलिबल प्रतियोगिता यही २८ देखि पुष २ गतेसम्म आयोजना गर्ने गरी तयारी अघि बढाइएको आयोजकले पत्रकार सम्मेलनमार्फत जानकारी दिएको छ ।
ADVERTISEMENT
हेटौंडाको हुप्रचौरमा हुने प्रतियोगिताको विजेताले ६५ हजार र उपविजेताले ३० हजार रुपैयाँसहित ट्रफी, मेडल र प्रमाणपत्र प्राप्त गर्नेछ । यस्तै विधागत उत्कृष्ट खेलाडीलाई समेत नगदसहित ट्रफीको व्यवस्था गरिएको आयोजक बसामाडी जेसीजको बर्ष सन् २०२२ का अध्यक्ष चिराग अग्रवालले जानकारी दिए । भलिबल प्रतियोगिताको लागि करिब साढे २ लाख रुपैयाँ खर्च हुने आयोजकको अनुमान छ । प्रतियोगितामा १० देखि १४ वटा टिमको सहभागिता हुने आयोजकले अपेक्षा राखेको छ । ‘नेतृत्व र व्यक्तित्व विकाससँगै जिल्लाको सामाजिक, सांस्कृतिक, शैक्षिक तथा खेलकुद क्षेत्रमा समेत बसामाडी जेसीजले विविध कार्यक्रमको आयोजना गर्दै आएको छ’, अध्यक्ष अग्रवालले भने, ‘जिल्लामा भलिबल खेलको विकास र खेलाडीको बीचमा भ्रातृत्वको सम्बन्ध स्थापनाका लागि हामीले यस प्रतियोगितालाई निरन्तरता दिँदै आएका छौं ।’
लक्ष्मीमाया बज्राचार्य स्मृति भलिबल प्रतियोगितालाई स्वर्ण भण्डारका सञ्चालक ज्योतिरत्न बज्राचार्यले प्रायोजन गर्दै आएका छन् । प्रतियोगिताको कार्यक्रम संयोजकमा बसामाडी जेसीजका कार्यकारिणी उपाध्यक्ष सरोज पौडेल तथा सहसंयोजकमा उपाध्यक्षद्वय अनिल भण्डारी र असिमराज ढुंगाना रहेका छन् । प्रतियोगितामा सहभागी हुन चाहने टिमले मंसिर २६ गते सम्म टिम दर्ता गराउन सक्ने आयोजकले बताएको छ । यस प्रतियोगिताको अघिल्लो संस्करण हटिया स्पोर्टस् एकेडेमीले जितेको थियो ।
ADVERTISEMENT
