हेटौंडा, संविधान दिवस तथा राष्ट्रिय दिवसको अवसरमा आयोजित मैत्रीपूर्ण भलिबल प्रतियोगिताको उपाधी सामूदायिक सेवा केन्द्र तथा सामुदायिक प्रहरी सेवा केन्द्र हेटौंडा ११ ले जित्न सफल भएको छ । आज भएको फाइनल खेलमा मकवानपुर जिल्ला खेलकुद विकास समितिलाई पराजित गर्दै सामुदायिकले उपाधी चुमेको हो ।
ADVERTISEMENT
पहिलो सेट २१–२५ ले गुमाएको सामुदायिक सेवा केन्द्रले खेलमा कम ब्याक गर्दै दोस्रो सेट २५–१४ र तेस्रो सेट १५–७ ले विजयी भएको हो । प्रतियोगिताको सेमिफाइनल खेलमा बकैयाँ गाउँपालिकालाई २५–१५, १५–२५ र १५– ६ ले पराजित गर्दै सामुदायिक सेवा केन्द्र फाइनल प्रवेश गरेको थियो । त्यसैगरी सेमिफाइनल खेलमा कैलास गाउँपालिकालाई २५–१४ र २५–१५ को सोझो सेटले पराजित गर्दै मकवानपुर जिल्ला खेलकुद विकास समिति फाइनल प्रवेश गरेको थियो ।
१३ टिमले सहभागिता जनाएको प्रतियोगिताको विजेता टिमले नगद २० हजार रुपैयाँ, उपविजेता टिमले नगद १५ हजार रुपैयाँ र अनुशासित टिमलाई नगद ५ हजार रुपैयाँ प्रदान गरिने आयोजक बागमती प्रदेश खेलकुद परिषद् कार्यालय प्रमुख बद्री पाठकले जानकारी दिए । असोज ३ गते संविधान दिवसका दिन पुरस्कार वितरण गरिने उनले बताए ।
