हेटौंडा, हेटौंडा उपमहानगरपालिकामा तत्काल सेवा परिपुर्तीका लागि करार तथा ज्यालादारीमा नियुक्त भएका ७१ जना कर्मचारीको करार सम्झौता नविकरण नगर्ने निर्णय भएको छ । उपमहानगरले विभिन्न समयमा विज्ञापन प्रकाशन नगरी आन्तरिक रुपमा नियुक्त गरेका ७१ जना करार र ज्यालादारीका कर्मचारीको करार सम्झौताको म्याद थप नगर्ने निर्णय गरेको हो।
ADVERTISEMENT
उपमहानगरको कार्यपालिका बैठक तथा नगरसभाबाट ७१ जना करार तथा ज्यालादारीका कर्मचारीको करार नविकरण नगर्ने निर्णय गरेको थियो । सेवाबाट बाहिरिनेमा स्वास्थ्य शाखाका कर्मचारीको संख्या धेरै रहेको छ । इञ्जिनियरदेखि सहायक चौथो स्तर पदमा कार्यरत स्वास्थ्य, योजना, प्रशासन लगायतका शाखामा कार्यरत कर्मचारीहरुको जागिर गएको हो । हेटौंडा उपमहानगरका मेयर मीनाकुमारी लामा र पूर्व मेयर हरिबहादुर महतको तोक आदेशबाट उनीहरु जागिरमा भर्ती भएका थिए । उपमहानगरपालिकाका प्रवक्ता सविन न्यौपानेले जागिरबाट हटाएको भन्दा पनि आवश्यक नभएका कर्मचारीको सम्झौता नविकरण नभएको बताए ।
‘तत्कालका लागि पदपुर्ती गर्न करार र ज्यादालारीमा कर्मचारी नियुक्त गरिएको थियो । तोक आदेश अनुसार नियुक्त भएका कर्मचारीको सम्झौता नविकरण नगर्ने निर्णय गरिएको हो’, प्रवक्ता न्यौपानेले भने, ‘आवश्यक कर्मचारी पुनः प्रक्रिया अनुसार माग गरिनेछ । आवश्यक कर्मचारी लोकसेवा मार्फत पनि माग भैरहेको छ ।’ करारका कर्मचारी राखिरहँदा उपमहानगरपालिकालाई आर्थिक भार समेत परिरहेको उनले जानकारी दिए । उपमहानगरका विभिन्न समयमा विज्ञापन नै नगरी ‘राजनीतिक पावर’को आधारमा नियुक्त भएकाहरुको जागिर गुमेको एक कर्मचारीले बताए । उनीहरुले लोकसेवा मार्फत आएका कर्मचारीहरुलाई समेत नटेर्ने गरेको उनको ती कर्मचारीको भनाई छ ।
