कक्षा १ देखि ३ सम्मको अभिभावक भेला

हेटौंडा–४ मा रहेको नवोदय शिशु सदन अङ्ग्रेजी माध्यमिक विद्यालयमा कक्षा १ देखि ३ सम्म अध्ययनरत विद्यार्थीको अभिभावक भेला शनिबार भएको छ । विद्यालयको प्राङ्गणमा भएको अभिभावक भेलामा कक्षा १ देखि ३ सम्मका विद्यार्थीहरुले स्टेज प्रस्तुती, गायन तथा नृत्यमा सहभागीता जनाएका थिए । यो विद्यालयको २७ औँ अभिभावक भेला हो ।

विद्यालयका निर्देशक दीपेश जोशीले कार्यक्रम उद्घाटन गरेका थिए । विद्यार्थीको प्रतिभा उजागर गर्ने प्लेटफर्म अभिभावक भेला रहेको कक्षा १ देखि ३ सम्मका संयोजक जमुना थापाले बताइन् । कक्षा २ मा नेपाली विषय अध्यापन गराउने शिक्षिका पूजा आचार्यले औपचारिक कार्यक्रम सञ्चालन गरेकी थिइन् ।

विद्यालयका व्यवस्थापन समितिका अध्यक्ष पुरनबहादुर जोशीलगायत अभिभावक, शिक्षकहरुको सहभागिता रहेको थियो । विद्यालयले गत पुस २३ गते कक्षा कक्षा ७, ८ र ९ को अभिभावक भेला सम्पन्न गरिसकेको छ । कक्षा ४, ५, ६ र प्राथमिक तहको अभिभावक भेला विभिन्न मितिमा आयोजना गर्ने विद्यालयले जनाएको छ ।