११ वर्षपछि हेटौंडामा महिला उद्यमी प्रदर्शनी

हेटौंडा, महिला उद्यमीले उत्पादन गरेका हस्तकला एवम् वस्तुको प्रवद्र्धन गर्ने उद्देश्यले हेटौंडामा महिला उद्यमी प्रदर्शनी हुने भएको छ । मकवानपुर उद्योग वाणिज्य संघ तथा महिला उद्यमी विकास समितिको संयुक्त आयोजनामा आगामी चैत २ गतेदेखि ६ गतेसम्म आठौं संस्करणको प्रदेश स्तरीय महिला उद्यमी प्रदर्शनी हुन लागेको महिला उद्यमी विकास समितिका अध्यक्ष अंकिता सुमार्गीले जानकारी दिइन् ।

‘११ वर्षपछि हेटौंडामा महिला उद्यमी प्रदर्शनी आयोजना गर्न लागेका हौँ ।’ सुमार्गीले भनिन् –‘५ दिनसम्म सञ्चालन हुने प्रदर्शनीमा महिला हस्तकलाको प्रदर्शनी, खाना महोत्सव, वस्तुको प्रदर्शनी, अन्तरक्रिया कार्यक्रमलगायत सांस्कृतिक कार्यक्रम पनि हुनेछ ।’ प्रदर्शनीमा करिव ३५ वटा स्टल रहने उनले जानकारी दिइन् । ‘महिला उद्यमीलाई कुनै पनि भार नपरोस् भनेर निःशुल्क स्टलको व्यवस्था गरेका छौँ । उद्यमी आफैँले खान र बस्नको व्यवस्था गर्नुपर्ने छ।’–उनले भनिन् । कार्यक्रमको लागि लागि मकवानपुर उद्योग वाणिज्य संघ, बागमती प्रदेशभित्रका उद्यमीहरूको सहभागिताका लागि पत्राचार गरिसकेको उनले बताइन् ।

‘शुरुको दिन कार्यक्रमको उद्घाटन हुनेछ। दोस्रो दिन विहान ११ बजेदेखि २ बजेसम्म ग्राउण्ड लेभलदेखि राम्रो उद्यमी गरिरहनु भएका व्यक्तिहरुको सफलताको कथा राख्न खोजेका छौँ । महिलाहरुको अन्तरक्रिया कार्यक्रम, दिउँसो २ बजेदेखि ६ बजेसम्म स्थानीय कलाकारहरुलाई समेटेर सांस्कृतिक कार्यक्रम पनि सञ्चालन गर्न खोजेका छौँ ’–उनले भनिन् ।