हेटौंडा, कार्तिक २९ गतेबाट थाहा नगरपालिकामा सातौं राष्ट्रपति रनिङ शिल्ड तथा मेयरकप भलिबल प्रतियोगिता सुरु भएको छ। थाहा नगरपालिका मेयर विष्णुबहादुर विष्टले एक समारोहबीच प्रतियोगिता उद्घाटन गरेका हुन् । उद्घाटनमा बोल्दै उनले खेलकुदको माध्यमबाट राष्ट्रिय तथा अन्तराष्ट्रिय क्षेत्रमा थाहानगरलाई चिनाउने गरी अघि बढ्न आग्रह गरे ।
थाहा नगरपालिका खेलकुद विकास समितिका संयोजक टिकारामा स्याङतानको अध्यक्षतामा भएको प्रतियोगिता थाहाको इन्द्रायणी चौर खेलकुद मैदान, निर्माणाधिन कभर्ड हल र पालुङ क्याम्पसको मैदानमा विभिन्न विधाका खेलहरु सञ्चालन हुने छन् । उद्घाटन कार्यक्रमकै बीचमा विभिन्न विद्यालयका विद्यार्थीहरुबीच मार्चपास गरेका थिए । मार्चपासमा नाटेश्वर मावि टौखेल प्रथम, स्वच्छन्दभैरव मावि द्वितीय र पालुङ भ्याली हार्ट एकेडेमी तथा सुन्दरीदेवी मावि तृतीय भएका थिए । स्वास्थ्यका लागि खेलकुद, राष्ट्रको लागि खेलकुद भन्ने नाराका साथ प्रतियोगिता मङ्सिर १ गतेसम्म सञ्चालन हुने छ । कार्यक्रममा नगर उपप्रमुख भरत गोपाली, प्रमुख प्रशासकीय अधिकृत कृष्ण गिरी, राजनीतिक दलका प्रतिनिधि, जनप्रतिनिधिलगायतको उपस्थिती रहेको थियो ।
राष्ट्रपति रनिङ शिल्ड प्रतियोगितामा छात्र/ छात्रा दौड १०० मिटर, २ सय मिटर, ४ सय मिटर, ८ सय मिटर, १५ सय मिटर, तथा ३ हजार मिटर दौड हुनेछन । त्यस्तै छात्र/ छात्रा रिले दौड १ सय मिटर, ४ सय मिटर, छात्र/ छात्रा हाईजम्प, छात्र छात्रा त्रिपल जम्प, छात्र/छात्रा सटफुट तथा मार्चपास रहेका छन् भने कराते पनि प्रतियोगितामा रहेको छ । राष्ट्रपति रनिङ शिल्ड खेलकुद प्रतियोगितामा प्रथम हुने विद्यालयले नगद रु २५ हजार शिल्ड मेडल र प्रमाणपत्र, द्धितिय हुने विद्यालयले नगद रु १५ हजार शिल्ड मेडल र प्रमाणपत्र, तृतिय हुने विद्यालयले नगद रु १० हजार शिल्ड मेडल र प्रमाणपत्र प्राप्त गर्नेछन् ।
मेयर कप भलिबल प्रतियोगिता अन्तर्गत प्रथम हुने विद्यालयले नगद रु १५ हजार शिल्ड मेडल र प्रमाणपत्र, द्धितीय हुने विद्यालयले नगद रु १० हजार शिल्ड मेडल र प्रमाणपत्र, तृतिय हुने विद्यालयले नगद रु ५ हजार शिल्ड मेडल र प्रमाणपत्र प्राप्त गर्नेछन् ।
