हेटौंडा, सडक डिभिजन हेटौंडाले बजारको मुख्य सडक विस्तार कार्य तत्कालका लागि स्थगित गरेको छ। हेटौंडा उपमहानगरपालिका भित्र पर्ने राष्ट्रिय लोकमार्गहरूको सडक सीमा संरक्षण कार्यक्रम, २०८२ सर्वोच्च अदालतको उत्प्रेषण आदेशका कारण रोकिएको सडक डिभिजनका प्रमुख गुरुप्रसाद अधिकारीले जानकारी दिए।
ADVERTISEMENT
गत शनिबार सडक डिभिजनले एकैदिन ५३१ वटा संरचना हटाएको थियो। भत्काइएका घर तथा संरचनाबाट सामग्री सार्न दुई दिनको समय दिइएको प्रमुख अधिकारीले बताए। उनका अनुसार, “सडक सीमा संरक्षण अभियानअन्तर्गत प्रकाशित सूचनाका विरुद्ध सरोकारवालाहरूले सर्वोच्च अदालतमा रिट निवेदन दिएका थिए। सर्वोच्च अदालतबाट २०८२ मंसिर १९ गते जारी उत्प्रेषण आदेश मंसिर २१ गते दिनको १२स्४६ मा म्याद तामेल भएकाले अदालतको आदेशलाई सम्मान गर्दै सूचनामा उल्लिखित सबै काम हालका लागि स्थगित गरिएको छ।”
हेटौंडा सडक विस्तारसम्बन्धी सरकारी सूचना कार्यान्वयन नगर्न सर्वोच्च अदालतले मंसिर १९ मा उत्प्रेषण आदेश जारी गरेको थियो। जिल्ला प्रशासन र सडक डिभिजन कार्यालयले भने आफूलाई आधिकारिक रूपमा आदेश प्राप्त नभएको भन्दै शनिबार बिहानै डोजर चलाएर ५३१ वटा घर-टहरा भत्काएका थिए।
सर्वोच्चले रोक लगाइसकेको छ भन्ने जान्दा जान्दै आधिकारिक चिठीका नाममा डोजर चलाएर राज्यले आतंक मच्चाएको स्थानीयको आरोप छ।
