हाँडीखोलामा २१० को आँखा जाँच्दा १८ मा मोतिबिन्दु

हेटौँडा, मकवानपुरको मनहरी गाउँपालिकास्थित हाँडीखोलामा बुधबार निशुल्क आँखा शिविर भएको छ । २१० जनाको आँखा जाँच गर्दा १८ जनामा मोतिबिन्दु फेला परेको छ ।

ADVERTISEMENT

रोटरी क्लव अफ काठमाडौ मिडटाउन र हेटौंडा सामुदायिक आँखा अस्पतालको आयोजनामा भएको कार्यक्रममा स्थानीय आयोजकको रुपमा मनहरी गाउँपालिका ३ नम्बर वडा कार्यालय र चैनपुर जेसीज मनहरी रहेको थियो । मनहरी गाउँपालिकाको सभाहलमा भएको कार्यक्रममा स्थानीयको सकृय सहभागिता रहेको थियो । मोतिबिन्दुका बिरामीलाई यहि शुक्रबार हेटौंडास्थित सामुदायिक अस्पतालमा निशुल्क शल्यक्रिया गरिने आयोजकले जानकारी दिएको छ ।

शिविरमा मोतिबिन्दुसँगै चस्मा लगाउनुपर्ने, दृष्टिदोष लगायतका समस्या बेसी देखा परेको चिकित्सकहरुले जानकारी दिएका छन् । शिविरमा हेटौंडा सामुदायिक आँखा अस्पतालका ४ जना चिकित्सकको टोलीले आँखा जाँच गराएका थिए । स्थानीय आयोजक मनहरी गाउँपालिका ३ नम्बर वडा अध्यक्ष अनन्तप्रकाश अर्यालले रोटरी र जेसीजसंगको समन्वयमा आफ्नो वडामा आँखा शिविर सन्चालन गर्न पाएकोमा खुसी व्यक्त गरे । ‘२१० जनाको आँखा परीक्षणबाट १८ जनाको मोतिबिन्दु फेला परेका छन् । यस कार्यक्रममा स्थानीय आयोजकको रुपमा काम गर्न पाउँदा निकै खुसी लागेको छु’, वडा अध्यक्ष अर्यालले भने । कार्यक्रममा चैनपुर जेसीज मनहरीका संस्थापक अध्यक्ष गणेशदर्पण अधिकारी, निवर्तमान अध्यक्ष रविन ढकाल, २०२५ का अध्यक्ष कृष्णप्रसाद ढकाल, २०२६ का अध्यक्ष सुरेश गौतम लगायतको उपस्थिति थियो ।