थाहा नगर उपविजेतामा सिमित

हेटौंडा, दोलखाको जिरीमा भएको बागमती प्रदेशस्तरीय अन्तरपालिका पुरुष भलिबल प्रतियोगितामा उत्तरी मकवानपुरको थाहा नगरपालिकाको भलिबल टिम उपविजेता भएको छ । भरतपुर महानगरपालिकाको टिमसँग ३–१ सेटमा पराजित हुँदै थाहा उपविजेता बनेको हो ।

ADVERTISEMENT

पहिलो र दोस्रो सेट १९–२५ र २२–२५ ले गुमाएको थाहाले तेस्रो सेट २५–२१ ले ‘कम ब्याग’ गर्न सफल भएको थियो । चौथो सेट १७–२५ ले गुमाएसँगै थाहा उपविजेतामा सीमित बनेको हो । थाहा नगरले नगद एक लाख एक हजार रुपैयाँसहित ट्रफी प्राप्त गरेको छ । उपाधि विजेता भरतपुर महानगरपालिकाले एक लाख ५१ हजार रुपैयाँ पाएको छ ।

प्रतियोगितामा थाहा नगरका उज्जवल लामा उत्कृष्ट डिफेण्डर घोषित भएका छन् । प्रतियोगितामा भरतपुर महानगरका मनिष मानन्धर उत्कृष्ट खेलाडी घोषित हुँदा नवीन महतो (पुतली) उत्कृष्ट स्पाइकर घोषित भए । दुर्गा बहादुर खड्का उत्कृष्ट व्लकर घोषित भए । विधागत उत्कृष्ट खेलाडीले जनही ५ हजार रुपैयाँ प्राप्त गरेका छन् ।

ADVERTISEMENT