जनहित वन समूहको भवन उद्घाटन

हेटौंडा, हेटौंडा १९ बस्तीपुरमा रहेको जनहित सामुदायिक वन उपभोक्ता समूहको नवनिर्मित प्रशासनिक कार्यालय भवन उद्घाटन गरिएको छ । वन समूहको २८ औं वार्षिक साधारणसभाको सन्दर्भमा शुक्रबार हेटौंडा उपमहानगरपालिकाका मेयर मीनाकुमारी लामा, १९ नम्बर वडा अध्यक्ष नरनाथ सुवेदी नवराज लगायतले संयुक्त रुपमा भवनको उद्घाटन गरेका हुन् ।

वडा कार्यालयको २५ लाख लागत तथा वन समूहको २० लाख गरी ४५ लाख रुपैयाँ लागतमा जनहित वन उपभोक्ता समूहको भवन निर्माण सम्पन्न भएको हो । गत चैत्र महिनाबाट भवन निर्माणको काम सुरु गरिएको समूहका अध्यक्ष विक्रमबहादुर पण्डितले जानकारी दिए । यसअघि वन समूहको भवन १९ नम्बर वडा कार्यालयलाई दिइएको थियो । कार्यक्रमका प्रमुख अतिथि हेटौंडा उपमहानगरका मेयर मीनाकुमारी लामाले जन्मदेखी मृत्युसम्म वनको महत्व र आवश्यकता रहेको उल्लेख गर्दै यसलाई जोगाउनुपर्ने धारणा राखिन् ।

स्वच्छ र सफा हेटौंडा अभियानमा वन समूहको साथ जरुरी रहेको उनको भनाई थियो । लामाले पर्यटन प्रवद्र्धनमा समेत सघाउ पु¥याउन तयार रहेको बताइन् । यस्तै हेटौंडा १९ नम्बर वडा अध्यक्ष नरनाथ सुवेदी नवराजले न्यून आय भएकाहरुको आयआर्जनमा जोड्ने कार्यक्रमहरु सञ्चालन गर्न सुझाव दिए ।

जंगलसँगै जमिन र जलको संरक्षण गर्नु आवश्यक रहेको उनको भनाई थियो । वन समूह अध्यक्ष पण्डितको अध्यक्षतामा भएको कार्यक्रममा सब डिभिजन वन कार्यालय प्रमुख बच्चुराम सुवेदी, कुवापानी सामुदायिक वन उपभोक्ता समूह अध्यक्ष लालबहादुर रुम्बा, टोल विकास संस्था समन्वय समिति हेटौंडा १९ संयोजक देवेन्द्र अर्याल, वन समूहका सल्लाहकार हरिवंश भेटवाल, लेखा संयोजक मदनकृष्ण उप्रेती लगायतले मन्तव्य व्यक्त गरेका थिए । कार्यक्रममा १९ नम्बर वडाका विभिन्न सामाजिक संघ संस्थाका प्रमुख प्रतिनिधिहरुको आतिथ्यता थियो ।