हेटौडा, मदन भण्डारी स्वास्थ्य विज्ञान प्रतिष्ठान, हेटौंडा अस्पताल र अस्पतालको सेवा सुधारको माग गर्दै निरन्तर आन्दोलन गरिरहेका सार्वजनिक सेवा सुधार संघर्ष समितिबीच १५ बुँदे सहमति भएको छ । सेवा लिने क्रममा हेटौंडा अस्पतालमा सर्वसाधारण र विरामीले सास्ती झेल्न बाध्य भएको भन्दै मकवानपुरका स्वतन्त्र युवाहरुले अस्पतालको मुख्य प्रवेशद्वारमा ५ दिनदेखि दिनहुँ शान्तिपूर्ण प्रदर्शन गरिरहेका थिए ।
ADVERTISEMENT
अस्पतालले बिरामीको सेवामा ढिलासुस्ती र मनलाग्दी गरेको भन्दै मकवानपुरका युवाहरुले सोमबारदेखि अस्पतालमा प्रदर्शन गरेका हुन् । उनीहरुबीच भएको सहमतिमा तोकेको समयमा यस संस्थामा कुनै डाक्टरले अन्य मेडिकलमा गएर सेवा लिएको पाइएमा तत्काल कानुनी कारवाही गरिने, अस्पताल परिसरको आवश्यक सुरक्षाको उचित प्रबन्ध गरिने, सेवाग्राहीहरुलाई सहज सेवा प्रदान गर्न हेल्प डेस्कको स्थापना गरिने लगायतको बुँदाहरु रहेका छन् ।
सहमतिमा अस्पतालको तर्फबाट मेडिकल सुपरिटेन्डेन्ट डाक्टर रामचन्द्र सापकोटा, व्यवस्थापना समिति सदस्य उत्सव चौलागाईं, हिरा लामाले हस्ताक्षर गरेका छन् भने संघर्ष समितिको तर्फबाट दिपेन्द्र चन्द ठकुरी, दिनेश लामा वाइबा, कृष्ण राज कोइराला, रामसरण कार्की लगायत ९ जनाले हस्ताक्षर गरेका छन् । संघर्ष समितिका दिपेन्द्र चन्द ठकुरीले सहमति भएपनि अस्पतालमा हुने बेथितिको बारेमा निरन्तर खबरदारी गर्ने बताए ।
