हेटौंडा, कैलाश गाउँपालिका स्तरीय अन्तर–वडा प्रथम अध्यक्ष कप नकआउट रनिङ शिल्ड फुटबल प्रतियोगिता सुरु भएको छ ।
ADVERTISEMENT
गाउँपालिका अध्यक्ष लोकबहादुर मुक्तानले रनिङ शिल्ड सार्वजनिक गर्दै प्रतियोगिताको उद्घाटन गर्नुभएको थियो । उहाँले स्थानीय खेलाडीको मनोवल उच्च राख्न खेलकुद क्षेत्रलाई प्राथमिकता दिने बताए। पालिकाले आगामी बर्ष थप खेलका विधाहरु समावेश गर्दै प्रतियोगिताहरु आयोजना गर्ने उनले बताए ।
उपाध्यक्ष बालकुमार मल्ल ठकुरिले खेलकुदले आफ्नो स्वास्थ्यलाई स्वस्थ राख्नुका साथै आफ्नो गाउँठाउँ र देशलाई चिनाउन समेत योगदान पुग्ने बताए । उनले कैलाशको नाम चिनाउने गरि खेलकुद प्रतियोगिता गर्नुपर्छ भनेर प्रतियोगिताको आयोजना गरिएको बताए ।
वडा नम्वर २ का वडाध्यक्ष तथा सामाजिक विकास समितिका संयोजक राजेन्द्र घिसिङले प्रतियोगिता मैत्रीपूर्ण र सौहार्दपुर्ण ढंगले पूरा गर्न खेलाडीहरुलाई अनुरोध गरे ।
कैलाश खेलकुद विकास समिति संयोजक मोहन वाईवाको अध्यक्षतामा उद्घाटन कार्यक्रम भएको थियो । कार्यक्रममा वडा नम्बर ९ का वडाध्यक्ष भुवनसिं घलान, वडा नम्बर १० का वडाध्यक्ष सुर्य बहादुर भ्लोन, कालिका मावि नामटारका प्रधानाध्यापक रामप्रसाद कालाखेती, वडा नम्वर ९ का सचिव रामचन्द्र शिवाकोटीको उपस्थिति थियो ।
प्रतियोगितामा प्रथम हुनेलाई ६० हजार, द्वितीय हुनेलाई ४० हजार, तृतिय हुनेलाई २० हजार र सान्त्वना १० हजार रुपैंया नगद पुरस्कारको व्यवस्था गरिएको छ । प्रतियोगिताको विजयीले प्राप्त गर्ने रनिङ शिल्ड ६३ तोला चाँदिबाट निर्माण गरिएको आयोजकले जानकारी दिएको छ ।
उद्घाटन खेलमा वडा नम्वर १० विजयी
कैलाश गाउँपालिका स्तरीय अन्तर–वडा प्रथम अध्यक्ष कप नकआउट रनिङ शिल्ड फुटबल प्रतियोगिताको उद्घाटन खेलमा वडा नम्वर १० विजयी भएको छ । वडा नम्वर १० ले वडा नम्वर २ लाई ४–० गोलअन्तरले पराजित गरेको छ ।
यसैगरि आज भएको दोस्रो खेलमा वडा नम्वर ५ विजयि भएको छ । वडा नम्वर ५ ले वडा नम्वर ७ लाई ३(० गोलअन्तरले पराजित गरेको कैलाश खेलकुद विकास समिति संयोजक मोहन वाईवाले जानकरी दिए ।
आइतबार ३ वटा खेल हुने छ। बिहान ८ बजे वडा नम्बर १ र वडा नम्बर ३, दिउँसो १ बजे वडा नम्बर ८ र वडा नम्बर ९ तथा दिउँसो ४ बजे वडा नम्वर ४ र शनिवारको बिजेता टिम वडा नम्वर ५ बिच प्रतिस्पर्धा हुँदैछ ।
