हेटौंडा, प्रदेश खेलकुद विकास परिषद बागमती प्रदेशको आयोजनामा भएको दोस्रो प्रदेश खेलकुद प्रतियोगिता अन्तर्गत क्रिकेट प्रतियोगितामा मकवानपुरले विजयी शुरुवात गरेको छ । बुधबार भएको प्रतियोगितामा भक्तपुरलाई ७ विकेटले पराजित गर्दै मकवानपुरले पहिलो खेलमा जित हासिल गरेको छ ।
टस जितेर मकवानपुरले सुरुमा बलिङ रोजेको थियो। ब्याटिङको लागि मैदानमा उत्रेको भक्तपुर १५ ओभरमै अलआउट हुँदै ७१ रनमै सिमित बन्यो । भक्तपुरको लागि सुबास खत्रीले २२ रन र कृस कार्कीले ३० रन बाहेक अरु खेलाडीले रन बटुल्न सकेनन । भक्तपुरलाई सस्तैमा समेट्नको लागि मकवानपुरको तर्फबाट रिजन ढकालले ४ विकेट, असिम श्रेष्ठले ३ विकेट, रामनरेश गिरी र समिर चौलागाईले समान १ विकेट लिन सफल भए ।
झिनो स्कोरको लक्ष्य पाएको मकवानपुरले ११ दशमलव ३ ओभरमा ३ विकेटको नोक्सानीमा लक्ष्य भेट्टायो । मकवानपुरको लागि गौरभ खड्काले ३४ बलमा ३४ रन, तक्क्षक सिम्खडाले २७ बलमा २१ रन जोड्न सफल भए । भक्तपुरको लागि सुबास खत्रीले २ विकेट र सक्रिय प्रताप कार्कीले १ विकेट लिन सफल । मकवानपुर जिल्लाबाट ४ विकेट लिएका रिजन ढकाल प्रतियोगिताको म्यान अफ द म्याच घोषित भए ।
प्रतियोगिताको समूह ए मा मकवानपुर, भक्तपुर, नुवाकोट, सिन्धुपालचोक र नुवाकोट जिल्ला रहेको छ भने समूह बी मा धादिङ, काठमाडौं, काभ्रे, चितवन, दोलखा, रामेछाप जिल्ला रहेका छन् ।
