शिक्षक भलिबल उपाधीको लागि जीएस र नवोदय भिड्ने

हेटौंडा, हेटौंडामा जारी नगर स्तरीय शिक्षक भलिबल उपाधीको लागि जीएस निकेतन विद्यालय र नवोदय शिशु सदन अङ्ग्रेजी माध्यमिक विद्यालय भिड्ने भएको छ । शनिबार भएको पहिलो सेमिफाइनल खेलमा जीएसले जेनिथ इन्टरनेशनल एकेडेमीलाई सोझो सेटमा पराजित गरेको हो । जीएसले २५–१० र २५–१८ को सोझो सेटले जेनिथलाई पराजित गरेको हो ।

यसैगरी शनिबार भएको दोस्रो सेमिफाइनल खेलमा नवोदय शिशु सदन अङ्ग्रेजी माध्यमिक विद्यालयले जनप्रिय माध्यमिक विद्यालयलाई सोझो सेटले पराजित गरेको हो । नवोदयले जनप्रियलाई २५–१८ र २५–१९ को सोझो सेटले हराएको हो ।प्रतियोगितामा जेनिथ विद्यालयले तासिर अङ्ग्रेजी माध्यमिक विद्यालयलाई र जनप्रियले आधुनिक राष्ट्रिय माध्यमिक विद्यालयलाई पराजित गर्दै सेमिफाइनल प्रवेश गरेको थियो । हेटौँडा उपमहानगरपालिकाको शिक्षा महाशाखाले आयोजना गरेको प्रतियोगितामा नगरका १५ वटा विद्यालयको सहभागिता जनाएको थियो ।

प्रतियोगिताको विजेताले नगद ३० हजार र उपविजेताले नगद २५ हजार रुपैयाँ सहित शिल्ड, मेडल र प्रमाणपत्र प्राप्त गर्ने छन् । प्रतियोगिताको सेमिफाईनलमा पराजित हुने टिमलाई जनही १५ हजार रुपैयाँ प्रदान गरिने खेलकुद संयोजक राजाराम पोख्रेलले जानकारी दिए । प्रतियोगिताको फाइनल खेल असार १० गते दिउँसो ४ बजे हुनेछ ।