महिला र किशोरीलाई बासुरी बजाउने तालिम

हेटौंडा, थाहानगरपालिका १ मा रहेको कुन्छाल र कुलगाउँमा ६० जना महिला र किशोरीहरुले बासुरी बजाउने तालिम लिइरहेका छन् । नेवारी संस्कृतिभित्र पर्ने बासुरी बजाउने सीपलाई महिला र किशोरीलाई जानकारी गराउने उद्देश्यले कुन्छाल महिला बासुरी समूहले गत जेठ १५ गतेबाट तालिम प्रदान गर्दै आइरहेको छ ।

थाहा १ कुन्छालमा २० जना र कुलगाउँमा ४० जना महिला र किशोरीहरुको सहभागीतामा बासुरी बजाउने तालिम सञ्चालन भइरहेको समूहकी अध्यक्ष चमेली गोपालीले जानकारी दिइन् । बागमती प्रदेश सामाजिक विकास मन्त्रालयको अनुदानमा सञ्चालन भएको तालिम हप्ताको दुईदिन सञ्चालन हुने छ ।

‘संस्कृतिको रीतिरिवाजको जगेर्णा गर्न र महिलालाई अगाडि बढाउने उद्देश्यले तालिमको आयोजना गरेका हाँै । पहिलो चोटी आयोजना भएको बासुरी बजाउने तालिम ६ महिनासम्म सञ्चालन हुनेछ ।’ कुन्छाल महिला बासुरी समूहकी अध्यक्ष गोपालीले भनिन् –‘तालिम प्रदानको लागि काठमाडौंबाट ६० वटा बासुरी खरिद गरेका छौँ । कुन्छालमा धर्म मुनिकार र कुलगाउँमा कृश महर्जनले तालिम सहजीकरण गरिरहनु भएको छ ।’

हप्ताको दुईदिन सञ्चालन हुने बासुरी शुक्रबार बेलुका ७ बजेदेखि ९ बजेसम्म र शनिबार विहान ७ बजेदेखि ९ बजेसम्म, दिउँसो साढे १० बजेदेखि १ बजेसम्म र बेलुका ७ बजेदेखि ९ बजेसम्म सञ्चालन भइरहेको छ । कुलगाउँमा बलामी र गोपाली समूदाय रहेका छन् भने कुन्छालमा गोपाली समूदायको बाहुल्यता रहेको पाइन्छ ।