हेटौंडा/बागमती प्रदेशका भौतिक पूर्वाधार विकास राज्यमन्त्री सन्तबहादुर चेपाङले योजना कार्यान्वयनमा ढिलाई नगर्न मातहतका कार्यालयका कर्मचारीहरुलाई निर्देशन दिएका छन् । चालु आर्थिक वर्षमा छुट्याइएको योजना कार्यान्वयनमा ढिलाई नगर्न उनले निर्देशन दिएका हुन् ।
ADVERTISEMENT
सोमबार प्रदेशभित्रका पूर्वाधार विकास कार्यालय र सहरी विकास तथा भवन कार्यालयका प्रमुखहरुबीच मन्त्रालयमा भएको कार्यक्रम कार्यान्वयन बारेको छलफलमा राज्यमन्त्री चेपाङले डीपीआर गर्नुपर्ने योजनाहरुको डीपीआर सुरु गरी चाँडै ठेक्का लगाउन निर्देशन दिएका छन् । योजना कार्यान्वयन गर्न कुनै कानूनी वा नीतिगत समस्या भए पहिचान गरी यथाशिघ्र मन्त्रालयलाई जानकारी गराउन अनुरोध गर्दै उनले नभए चाँडै योजना कार्यान्वयनतर्फ लाग्न अनुरोध गरे ।
बहुवर्षीय ठेक्का लागेर काम भइरहेका सडक, भवन तथा पुलका योजनाहरु चाँडै सम्पन्न गर्न सम्बन्धित कार्यालयमा दवाव दिनुपर्ने उनको भनाई थियो । यसअघि डीपीआर भएर बसेका योजनाहरुमा आवश्यक बजेट विनियोजन गरिएको भन्दै राज्यमन्त्री चेपाङले कुनै योजनामा बजेट विनियोजन गर्न छुटेको भए संशोधन गरी बजेट प्रदान गरिने प्रतिवद्धता पनि जनाए । कार्यालयहरुमा कर्मचारीको अभाव भएको गुनासो आएको भन्दै उनले सबै कार्यालयहरुमा स्थायी कर्मचारी थप गर्ने प्रक्रिया अघि बढिसकेको जानकारी दिए ।
विगतमा कार्यालयका कर्मचारीको मनमुटाव तथा सल्लाह र समन्वय नहुँदा पनि योजना कार्यान्वयनमा असर परेको स्मरण गर्दै त्यस्तो अवस्थाको अन्त्य गर्न राज्यमन्त्री प्रजाले सचेत गराएका छन् । छलफलमा मन्त्रालयका सचिव शंकरप्रसाद पण्डितले कार्यक्रमहरु कार्यान्वयनमा कुनै समस्या भए प्रष्ट रुपमा राख्न कार्यालय प्रमुखहरुलाई आग्रह गरेका थिए ।
