अपहरणको नाटक गर्ने एक प्रहरीको फन्दामा

हेटौंडा, आफैं लुकेर अपहरणको नाटक गर्ने एकजना प्रहरीको फन्दामा परेका छन् । मकवानपुरको राक्सिराङ गाउँपालिका ५ का ४६ वर्षका कुमार प्रजा प्रहरीको फन्दामा परेका हुन् ।स्थानीय निर्मल भन्ने सानुबाबु रुम्बासँगको लेनदेनमा विवाद भएपछि प्रजा भदौ ३ गतेबाट हराइरहेका थिए । प्रजाको श्रीमतिले आफ्नो श्रीमान हराएको र रुम्बाले बेपत्ता पारी अपहरण गरेको हुनसक्ने भन्दै प्रहरीमा उजुरी दिएकी थिइन् ।

खोजतलास एवम् अनुसन्धानको क्रममा कुमार प्रजा निरन्तर उनको श्रीमति तथा परिवारको सम्पर्कमा रहेको पाइएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक टेकबहादुर कार्कीले जानकारी दिए । ‘लेनदेनको विषयमा विवाद भएपछि श्रीमतिले अपहरणमा परेको भन्दै उजुरी दिएको आवश्यक अनुसन्धानको क्रममा निरन्तर परिवार तथा श्रीमतिसँगको सम्पर्कमा रहेको पाएपछि हामीले कुमार प्रजालाई नियन्त्रणमा लिएका छौं’, प्रवक्ता कार्कीले भने, ‘प्रजालाई मनहरी गाउँपालिका ४ नयाँबस्ती स्थित सूर्यबहादुर प्रजाको घरबाट नियन्त्रणमा लिएका हौं ।’

श्रीमान अपहरणमा परेको भन्दै प्रजाको श्रीमति आइतीमाया चेपाङले उजुरी दिएकी थिइन् । उनलाई ईलाका प्रहरी कार्यालय मनहरीको टोलीले नियन्त्रणमा लिएको हो । किन लुकीछिपी बसेर अपहरणको झुटो अफवाह फैलाएको भनेर सोध्दा उनले प्रहरी टोलीलाई नै अश्लील शब्दहरु बोल्दै दुव्र्यवहार गरेको डीएसपी कार्कीले बताए । प्रजामाथि आवश्यक अनुसन्धान एवम् कारबाही प्रक्रिया अघि बढाइएको जिल्ला प्रहरी कार्यालय मकवानपुरले जानकारी दिएको छ ।