मकवानपुरमा राति ९ बजेसम्म मात्रै देउसी-भैलो खेल्न पाइने

हेटौंडा, मकवानपुर जिल्लामा यो वर्षको तिहारमा राति ९ बजेसम्म मात्र देउसी भैलो खेल्न पाइने भएको छ ।
मकवानपुरका प्रमुख जिल्ला अधिकारी सूर्यप्रसाद सेढाईंका अनुसार राति ८ बजेबाट देउसी भैलो खेल्ने टोलीलाई स्थानीय प्रहरीले समापन गर्न लगाउने र ९ बजेबाट पूर्णरुपमै रोकिने बताए । ‘यसवर्ष तिहार लामो छ । जति खेले पनि समय पुग्छ ।’

उनले तिहारको समयमा मदिरा सेवनमा धेरै कडाइ गरिने बताए । ‘झैझगडा र सम्भावित दुर्घटनालाई रोक्नका लागि तिहारमा मदिरा सेवनलाई कडाइ गर्न लागिएको हो ।’, प्रजिअ सेढाईंले भने ।

उनका अनुसार यसवर्ष तिहारमा चोकचोकमा प्रहरी चेकिङ राखिनेछ । ‘तिहारको समयमा मापसे गरी सवारी चलाउनको संख्या धेरै हुने गरेको छ ,त्यसकारण हामी चेकजाँचलाई कडाई गर्नेछौं ।’, उनले भने ।
आज देखि यमपञ्चक सुरु भएको छ। यमपञ्चकको पहिलो दिन, आज धन त्रयोदशी अर्थात् धनतेरस मनाइँदैछ।