अन्तराष्ट्रिय ‘हेटौंडा कप’ एशियाली बुद्धिचाल प्रतियोगिता हुने

हेटौंडा, हेटौंडामा पहिलो पटिक अन्तराष्ट्रिय ‘हेटौंडा कप’ एशियाली बुद्धिचाल प्रतियोगिता हुने भएको छ । मकवानपुर जिल्ला बुद्धिचाल संघको आयोजनामा यही मंसिर १२ गतेदेखि १७ गतेसम्म हेटौंडाको सामना होटलमा प्रतियोगिता हुँदैछ ।

‘हेटौंडामा प्रत्येक वर्ष राष्ट्रिय स्तरको बुद्धिचाल प्रतियोगिता भइरहेको छ ।’ मकवानपुर जिल्ला बुद्धिचाल संघका अध्यक्ष मनोज श्रेष्ठले भने –‘ चेस खेललाई प्रवद्र्धन गर्नको लागि हामीले पहिलो पटक हेटौंडामै अन्तराष्ट्रिय हेटौंडा कप एशियाली बुद्धिचाल प्रतियोगिता आयोजना गर्न लागेका छाँै । प्रतियोगितामा ८ वर्षदेखि ७० वर्ष उमेर समूहका २ सय जना खेलाडीको सहभागीता रहन्छ ।’

प्रतियोगिताको लागि प्रवेश शुल्क १० हजार रुपैयाँ तोकेको छ । मंसिर १२ गतेदेखि १७ गतेसम्मको प्रतियोगिताको लागि खाना, खाजा र बस्नको निःशुल्क व्यवस्था गरेको उनले बताए ।

प्रतियोगिताको लागि नगद पुरस्कार ५ लाख ८७ हजार ५ सय रुपैयाँ रहेको छ । जसमा प्रथम हुनेलाई नगद १ लाख २५ हजार रुपैयाँ, द्वितीय हुनेलाई ७५ हजार रुपैयाँ, तृतीय हुनेलाई ४० हजार रुपैयाँ, चौथोलाई २५ हजार, पाचौ हुनेलाई २० हजार रुपैयाँ, छैठौ देखि दशैँ हुने प्रत्येकलाई नगद १५ हजार रुपैयाँ, एघारौँ देखि पन्धौँ हुनेलाई ११ हजार रुपैयाँसहित शिल्ड, मेडल र प्रमाणपत्र प्रदान गरिने छ । साथै अन्य विधागतलाई पनि पुरस्कार प्रदान गर्ने आयोजकले जनाएको छ ।