हेटौंडा, १८ भदौ/निजी तथा आवासीय विद्यालय अर्गनाइजेसन नेपाल (प्याव्सन) बागमती प्रदेश समितिको आयोजनामा शनिबार हेटौंडामा भएको प्रदेशस्तरीय राष्ट्रिय लोक नृत्य प्रतियोगितामा धादिङ जिल्लाको एड्भान्स एकेडेमी प्रथम भएको छ ।
ADVERTISEMENT
प्रदेशस्तरीय छनौट प्रतियोगितामा प्रदेशका ९ जिल्लाका १९ वटा समूहले सहभागिता जनाएको थियो । प्रतियोगितामा थ्रीस्टार सेकेन्डरी स्कुल भक्तपुर द्वितीय, नारायणी विद्या मन्दिर स्कूल चितवन तृतीय, भ्याली पब्लिक स्कूल ललितपुर चौथो र रिलायन्स इंग्लिस सेकेण्डरी स्कूल हेटौंडा पाँचौ भएको छ । प्रतियोगितामा प्रथम भएको एड्भान्स एकेडेमीले भदौ २५ गते पोखरामा केन्द्रीय प्याव्सनद्वारा आयोजना हुने प्याव्सनराष्ट्रिय लोक नृत्य प्रतियोगितामा सहभागिता जनाउने छ । प्रदेश छनौट प्रतियोगितामा प्रथम, द्वितीय र तृतीय भएका विद्यालयलाई प्याव्सनले शिल्ड, मेडल प्रदान गरेको छ ।
प्याव्सन प्रदेश कार्यसमितिका अध्यक्ष केशवलाल श्रेष्ठको अध्यक्षतामा भएको कार्यक्रममा बागमती प्रदेशका सभामुख सानुकुमार श्रेष्ठको प्रमुख आतिथ्यता रहेको थियो । प्रमुख अतिथि श्रेष्ठले मानसिक अस्वस्थ भएका व्यक्तिलाई पनि नृत्यले शारीरिक रुपमा स्वस्थ्य बनाउने बताए । ‘जो मानिस नाँच्न, हाँस्न, गाउँन सक्दैन त्यस्ता व्यक्तिहरु डिप्रेसनमा जान्छन्’, श्रेष्ठले भने, ‘नृत्य पौराणिक कालदेखि चल्दै आएको हो । चाडपर्व मनाउँदा पनि हामीले साँस्कृतिक कार्यक्रम गर्दै आइरहेका छौं ।’ देशका विभिन्न स्थानमा अध्ययनरत विद्यार्थीहरुमाझ परिचय स्थापित गराई आपसी सद्भाव र भाईचाराको विकास गर्ने, विद्यार्थीहरुमा अन्तरनिहित प्रतिभालाई प्रस्फुटन गर्ने उद्देश्यले कार्यक्रम आयोजना गरिएको प्याव्सन बागमती प्रदेशका अध्यक्ष केशवलाल श्रेष्ठले बताए ।
कार्यक्रममा प्याव्सन केन्द्रीय सहकोषाध्यक्ष ग्रेस श्रेष्ठ, केन्द्रीय सदस्य मदन दाहाल, प्याव्सन मकवानपुरका अध्यक्ष बिनोद सुवेदीलगायतको आतिथ्यता रहेको थियो ।
