हेटौंडा, त्रिभुवन आर्मी क्लब सहिद स्मृति स्थानीय तह अन्तर्राष्ट्रिय फुटबल प्रतियोगिता–२०८० को पहिलो खेलबाटै बाहिरिएको छ। सडनडेथमा राजारानी क्लब धनकुटासँग ५–४ गोलअन्तरले पराजित हुँदै आर्मीको हेटौंडा यात्रा पहिलो खेलमै टुंगिएको हो ।
निर्धारिय समयमा १–१ गोलको बराबरी भएसँगै खेलको निर्णय सिधै ट्राइब्रेकरमार्फत् निर्णय गरिएको थियो ।
ADVERTISEMENT
टाइब्रेकरमा विजयी टोलीको तर्फबाट विशाल घलान, रुपेश केसी, दीप कार्कीले गोल गरेका थिए । ट्राइब्रेकरमा सुनिल खड्का र अशोक खवास गोल गर्न चुकेका थिए । ट्राइब्रेकरमा आर्मीको तर्फबाट जितेन्द्र कार्की, कमल थापा र रसबहादुर मगरले गोल गरेका थिए । ट्राइब्रेकरमा आर्मीका बसन्त जिम्बा र श्रीराम चौधरी गोल गर्नबाट चुकेका थिए ।
ट्राइब्रेकरमा ३–३ गोल भएपछि सडनडेथमा राजारानीका प्रवेश दनुवार र उमेश कार्कीले गोल गरेका थिए । आर्मीका विमल पाण्डेले सडन डेथमा गोल गर्दा सिद्धान्त चौधरीका प्रहार धनकुटाका गोलरक्षक दीप कार्कीले बचाएका थिए । उनी खेलको म्यान अफ दी म्याच घोषितहुँदै नगद दश हजार रुपैयाँ प्राप्त गरे ।
हेटौंडा–६, गौरीटारमा जारी खेलमा पहिलो गोल भने आर्मीले गरेको थियो । आर्मीको तर्फबाट ११ औं मिनेटमा रसबहादुर मगरले गोल गरेका हुन् । खेलको अन्तिम ६ मिनेट सम्हालिन नसक्दा धनकुटाले बराबरी गोल गर्न सफल भएको थियो । उसका लागि विदेशी खेलाडी अजायी मार्टिनले ८४ औं मिनेटमा गोल गर्दै खेललाई बराबरीमा ल्याएका थिए । उनले हेडमार्फत् गोल गरेका हुन् ।
आर्मीले खेलको पहिलो हाफ पूर्णरुपमा नियन्त्रणमा लिएपनि दोस्रो हाफमा कमजोर देखिएको थियो । आर्मीका सिनियर खेलाडी चोटका कारण मैदानमा उत्रिन नसक्दा राजारानी एफसीले त्यसको फाइदा उठायो ।
विजयी टोलीका प्रशिक्षक सविन न्यौपानेले आर्मीसँग जित्नेमा आफू ढुक्क रहेका प्रतिक्रिया दिए । ‘हाम्रा खेलाडीहरु अनुभवी थिए । आर्मी मिलाएर खेल खेल्ने टोली होइन । उनीहरु टेक्निकली कमजोर देखिए ।’ उनले आफ्नो टिम प्रतियोगिताको उपाधी दाबेदार टोली रहेको दाबी गरे ।
जिल्ला फुटबल संघ मकवानपुरको आयोजनामा जारी प्रतियोगिताको सेमिफाइनलमा आरआर एफसीले न्यूरोड टिम एनआरटीसँग प्रतिस्पर्धा गर्नेछ । प्रतियोगिताअन्तर्गत् मंगलबार थ्रीस्टार र सशस्त्र प्रहरीको एपीएफ क्लबसँग प्रतिस्पर्धा गर्नेछ ।
