मकवानपुर बहुमुखी क्याम्पसले शिक्षासम्बन्धी राष्ट्रिय सम्मेलन आयोजना गर्ने

हेटौंडा, मकवानपुर बुहुमुखी क्याम्पसले हेटौंडामा दुई दिने उच्च शिक्षाका चुनौती, रोजगारमुखी, दीगोपना र कक्षा छाड्ने दर घटाउनेु मूल विषयका राष्ट्रिय सम्मेलन आयोजना गर्ने भएको छ ।

यही जेठ ११ र १२ गते हुन लागेको राष्ट्रिय सम्मेलनको बारेमा सोमबार क्याम्पसका पदाधिकारी तथा प्रशासनले पत्रकार सम्मेलनको आयोजना गरी जानकारी दिएको हो । बागमती प्रदेश सरकारले बागमती विश्वविद्यालयको रुपमा विकसित गर्ने निर्णय गरेको मकवानपुर बहुमुखी क्याम्पसले पहिलो वर्षको सुरुवातमा कार्यक्रम आयोजना गर्न लागेको मकवानपुर बहुमुखी क्याम्पसका प्रमुख डाक्टर यसबहादुर शिल्वालले बताए ।

सम्मेलनले प्रतिस्पर्धी बजारमा सफल हुनका लागि आवश्यक सीप र ज्ञानयुक्त जनशक्ति उत्पादन गर्ने, दिगो विकासका अभ्यासहरुलाई मूल पाठ्यक्रममा समावेश गर्ने र सामुदायिक क्याम्पसहरुको दिगोपनका आधारहरुको खोजी गर्ने, विद्यार्थीले बीचमै पढाई छाड्ने दर घटाउने र शैक्षिक सफलतालाई बढावा दिनका लागि थप समावेशी सिकाईको वातावरण सृजना गर्ने उद्देश्य रहेको शिल्वालले बताए ।