हेटौंडा, नेपाल सितोरियो कराते संघ जिल्ला कार्य समिति मकवानपुरको आयोजनामा हुन लागेको प्रथम जिल्ला स्तरीय मेयर कप खुल्ला कराते प्रतियोगिताको तयारी पूरा भएको जनाएको छ ।
ADVERTISEMENT
मंसिर १४ र १५ गते हेटौंडामा आयोजना हुने कराते प्रतियोगिताको उद्घाटन हेटौंडा उपमहानगरपालिका मेयर मिनाकुमारी लामाले गर्ने भएकी छिन् । प्रतियोगिताको उद्घाटन मंसिर १४ गते बिहान ८ बजे हुने छ । दुई दिन आयोजना हुने प्रतियोगिताको पहिलो दिन उद्घाटन समारोह, सम्पूर्ण काता प्रतियोगिता र महिलाको कुमुते प्रतियोगिता हुनेछ भने दोस्रो दिन पुरूषको कुमुते प्रतियोगिताका सम्पूर्ण खेल, महिला र पुरुषको फाइनल प्रतियोगिता तथा कार्यक्रम समापन हुने नेपाल सितोरियो कराते संघ जिल्ला कार्य समिति मकवानपुरका अध्यक्ष दिपकबहादुर लामाले बताए ।
तौल समूह अन्तर्गत पुरुषतर्फ २५, ३०, ३५, ४२, ४७, ५२, ५७, ६२, ६७ केजी र महिलातर्फ २५, ३०, ३५, ४०, ४५, ५०, ५५ र ६० केजी तौल समूहमा प्रतिस्पर्धा गर्ने छन् । मकवानपुर जिल्लामा रहेका १५ वटा डोजोका ३ सय १५ जना खेलाडीले विभिन्न तौल समूहमा प्रतिस्पर्धा गर्ने छन् । जसमा एक डोजोबाट कुमिते पुरुष ९ जना, कुमिते महिला ८ जना, काता महिला र पुरुष २ जना, टिम कोच र मेनेजर गरी २ जना गरी २१ जनाले सहभागिता जनाउने अध्यक्ष लामाले बताए ।
ADVERTISEMENT
आयोजकले प्रत्येक खेलाडीलाई खाना र बस्नको व्यवस्था मिलाएको जनाएको छ । प्रतियोगिताको लागि लाइसेन्स होल्डर स्थानीय १० जना र बाहिरका २० जना गरी ३० जना रेफ्रीले निर्णायकको भूमिका निर्वाह गर्ने उनले जानकारी दिए ।
प्रतियोगितामा स्वर्ण, रजत र कास्य जित्ने खेलाडीलाई मेडल र प्रमाणपत्र प्रदान गरिने छ भने उत्कृष्ट खेलाडीलाई नगदको व्यवस्था गरेको आयोजकले जनाएको छ । प्रतियोगिताको लागि हेटौंडा उपमहानगरपालिकाले २ लाख रुपैयाँ सहयोग गर्नेछ भने बुद्ध स्नोकर हाउस हेटौंडा–४ र एस वान स्नोकर क्लव हेटौंडा १० प्रायोजक रहेको छ ।
