हेटौंडा, हेटौंडामा १५ वर्ष मुनीको पुरुष खेलाडीहरुको फुटबल प्रतियोगिता हुने भएको छ । पिप्ले युवा क्लव हेटौंडाको आयोजनामा यही मंसिर २७ गतेदेखि १५ वर्ष मुनिको ८ ए साइड फुटबल प्रतियोगिता आयोजना गर्न लागेको हो ।
हेटौंडा ५ नम्बर वडा कार्यालयको मुख्य प्रायोजनमा हुन लागेको प्रतियोगिताको विजेताले ५० हजार र उपविजेताले २५ हजार रुपैयाँसहित ट्रफी प्राप्त गर्नेछ । प्रतियोगिताको सर्वोत्कृष्ट खेलाडीले ५ हजार ५ सय रुपैयाँ प्राप्त गर्नेछन् भने विधागत उत्कृष्टले जनही नगद ३ हजार ५ सय रुपैयाँसहित ट्रफी प्राप्त गर्नेछन् ।
हेटौंडा ५ स्थित पिप्ले क्याम्पा रंगशालामा हुने प्रतियोगिताको तयारी तीव्र पारिएको आयोजक पिप्ले युवा क्लवका अध्यक्ष सुविन घिमिरेले जानकारी दिए । प्रतियोगिताको लागि करिब ४ लाख रुपैयाँ खर्च लाग्ने अनुमान गरिएको छ । आयोजकले टिम दर्ता शुल्क ४ हजार रुपैयाँ तोकेको छ । सुविन घिमिरेकै नेतृत्वमा रहेको एफसी मुण्डियालले अघिल्लो वर्ष यू २१ फुटबल प्रतियोगिता आयोजना भएको थियो ।
