हेटौंडा, नेपाल सितोरियो कराते संघ जिल्ला कार्य समिति मकवानपुरको आयोजनामा भएको प्रथम जिल्ला स्तरीय मेयर कप खुल्ला कराते प्रतियोगिताको उपाधी हेटौंडा मेन डोजोले जित्न सफल भएको छ ।
मंसिर १४ र १५ गते हेटौंडामा भएको प्रतियोगितामा हेटौंडा मेन डोजोले ९ स्वर्ण जित्दै टिम प्रथम बन्न सफल भएको हो । यसैगरी ६ स्वर्ण जित्न सफल भएको किड्स डोजो टिम दोस्रो हुन सफल भएको छ । प्रतियोगितामा प्रथम र दोस्रो भएको टिमलाई शिल्ड प्रदान गरिएको थियो भने तौल समूहमा प्रथम, दोस्रो र तृतीय भएकालाई मेडल र प्रमाणपत्र प्रदान गरिएको थियो । नेपाल सितोरियो कराते संघ जिल्ला कार्य समिति मकवानपुरका अध्यक्ष दिपकबहादुर लामाको अध्यक्षतामा भएको कार्यक्रममा हेटौंडा उपमहानगरपालिका ४ नम्वर वडाध्यक्ष नवीन सिग्देलले पुरस्कार वितरण गरेका थिए ।
प्रतियोगितामा उत्कृष्ट खेलाडी घोषित भएका मेन डोजोका कपिल डिम्डुङ्ग र श्रेया श्रेष्ठलाई नगदसहित पुरस्कार प्रदान गरिएको थियो । यसैगरी मेन डोजोका सुष्मा चौलागाई र किडस डोजोका क्रिपेश स्याङ्तान उदयमान खेलाडी घोषित भए । हेटौंडामा भएको प्रतियोगिताका तौल समूह अन्तर्गत पुरुषतर्फ २५, ३०, ३५, ४२, ४७, ५२, ५७, ६२, ६७ केजी र महिलातर्फ २५, ३०, ३५, ४०, ४५, ५०, ५५ र ६० केजी तौल समूहमा प्रतिस्पर्धा भएको थियो ।
कार्यक्रममा बागमती प्रदेश खेलकुद विकास परिषदका सदस्य संगीत श्रेष्ठ, मकवानपुर जिल्ला खेलकुद विकास समितिका निर्वतमान अध्यक्ष वेष खड्गीलगायतको आतिथ्यता रहेको थियो ।
