खेलकुद महोत्सव सुरु, हाजिरीजवाफमा ब्रम्हदिक एकेडेमी प्रथम

हेटौंडा, हेटौंडा उपमहानगरपालिका ४ नम्वर वडा कार्यालयको आयोजनामा एक महिना खेलकुद महोत्सव बुधबारबाट हेटौंडामा सुरु भएको छ । नवोदय शिशु सदन अङ्ग्रेजी माध्यमिक विद्यालयको व्यवस्थापनमा भएको वडा नम्वर ४ स्तरीय हाजिरीजवाफ प्रतियोगितामा ब्रम्हदिक एकेडेमी प्रथम भएको छ ।

हेटौंडा उपमहानगरपालिका ४ नम्वर वडामा रहेको ६ वटा सामूदायिक तथा संस्थागत विद्यालयको सहभागिता रहेको प्रतियोगितामा नवोदय शिशु सदन अङ्ग्रेजी माध्यमिक विद्यालय दोस्रो र आधुनिक राष्ट्रिय माध्यमिक विद्यालय तेस्रो भएको छ । प्रतियोगितामा ब्रम्हदिक एकेडेमी विद्यालयबाट आभाष घिमिरे, दिव्यान्स शाही र कृष्मा लोडारी, नवोदय शिशु सदन विद्यालयबाट आर्शिया बर्तौला, बिदान पकुवाल र पर्जन्य कुशवाहा र आधुनिक राष्ट्रिय माविका आभाष कटुवाल, निरँजन कुमार यादव र सुमन यादवले सहभागिता जनाएका थिए ।

प्रतियोगितामा विजयी भएका विद्यार्थीहरुलाई फागुन ७ गते औपचारिक कार्यक्रमको आयोजना गरी पुरस्कार वितरण गर्ने आयोजकले जनाएको छ । एक महिनासम्म सञ्चालन हुने महोत्सवमा वडा स्तरीय, नगर स्तरीय र जिल्ला स्तरीय गरी खेलकुदका क्रियाकलापहरु सञ्चालन हुने हेटौंडा–४ का वडाध्यक्ष नवीन सिग्देलले बताए ।

प्रतियोगितामा हेटौंडा उपमहानगरपालिका ४ नम्वर वडा सदस्य गिता त्रिपाठी, जगन्नाथ पाण्डे, वडा सचिव पुष्पराज पौडेल, शैक्षिक गुणस्तर सुधार समिति हेटौंडाका अध्यक्ष श्रीराम दहाललगायतको आतिथ्यता रहेको थियो ।