शिक्षकको आन्दोलनमा कांग्रेस बागमती प्रदेशको समर्थन

हेटौँडा, नेपाली कांग्रेस बागमती प्रदेश समितिले शिक्षकहरुको जारी आन्दोलनमा ऐक्यवद्धता जनाएको छ । समितिका सभापति इन्द्रबहादुर बानियाँले शनिबार विज्ञप्ति जारी गर्दै शिक्षकहरूको आन्दोलनमा ऐक्यबद्धता जनाएका हुन् ।

सभापति बानियाँले विज्ञप्तीमा सरकारले शिक्षकहरूसँग विगतमा गरेका सहमति कार्यान्वयन गर्न समेत आग्रह गरेका छन् ।

‘नेपाल शिक्षक महासङ्घले जारी राखेको आन्दोलनप्रति नेपाली कांग्रेस बागमती प्रदेश कार्यसमिति पूर्ण ऐक्यबद्धता रहेको छ, सभापति बानियाँद्वारा हस्ताक्षरित विज्ञप्तीमा उल्लेख छ ।

शिक्षा क्षेत्रको उन्नति लोकतन्त्रको आधार हो । यसप्रति नेपाली कांग्रेस बागमती प्रदेश कार्यसमिति प्रतिबद्ध रहेको र सरकारलाई शिक्षक महासङ्घले उठाएका जायज मागहरूलाई वार्ता मार्फत तत्काल समाधान दिन आग्रह गर्दछ, उनले भनेका छन् ।

नेपाल शिक्षक महासङ्घद्वारा विद्यालय शिक्षा ऐन जारीको माग गर्दै केही दिनदेखि काठमाडौँ केन्द्रित अनिश्चितकालीन आन्दोलनलाई सरकारले वार्ताका माध्यमबाट व्यवस्थापन गर्नुपर्ने सुझाव बानियाँको छ ।