हेटौँडा, आगामी जेठ ३ गतेबाट हेटौंडा उपमहानगरपालिका मेयर कप वडास्तरीय फुटबल प्रतियोगिता हुने भएको छ । नगर खेलकुद विकास समिति हेटौंडाको आयोजना तथा हेटौँडा उपमहानगरपालिकाको आर्थिक सहयोगमा सञ्चालन हुँदै आएको प्रतियोगिताको बारेमा आयोजकले मङ्गलबार पत्रकार सम्मेलनको आयोजना गरी जानकारी दिइएको हो ।
ADVERTISEMENT
हेटौंडा ५ स्थित पिप्ले–क्याम्पा रंगशालामा आयोजना हुने प्रतियोगिताको विजेताले २ लाख ५० हजार र उपविजेताले २ लाख रुपैयाँ नगदसहित ट्रफी र प्रमाणपत्र प्राप्त गर्ने नगर खेलकुद विकास समितिका अध्यक्ष रविन्द्रप्रसाद घिमिरेले जानकारी दिए । प्रतियोगितामा सर्वोत्कृष्ट खेलाडीले २० हजार तथा उत्कृष्ट फरवार्ड, मिडफिल्ड, डिफेन्स, गोलरक्षक र प्रशिक्षकले समान नगद १० हजार रुपैयाँसहित ट्रफी प्राप्त गर्ने छन् अघिल्लो वर्ष विजेताले २ लाख र उपविजेताले डेढ लाख रुपैयाँ पुरस्कार प्राप्त गरेकोमा यस वर्ष पुरस्कार राशी बढाइएको हो । प्रतियोगितामा उपमहानगरपालिका भित्रका वडाहरुले मात्रै सहभागिता जनाउन पाउनेछन् ।
