बागमती प्रदेशका पाँच मन्त्रीले लिए शपथ ग्रहण

हेटौँडा, बागमती प्रदेशका नवनियुक्त पाँच मन्त्रीले शुक्रबार पद तथा गोपनीयताको शपथ ग्रहण गरेका छन्। मुख्यमन्त्री इन्द्रबहादुर बानियाँले मन्त्रिपरिषदलाई पूर्णता दिएसँगै प्रदेश प्रमुख दीपकप्रसाद देवकोटाले उनीहरूलाई शपथ गराएका हुन्।

मुख्यमन्त्री बानियाँले भदौ २७ गते प्रदेशसभाबाट विश्वासको मत प्राप्त गरेपछि कांग्रेस केन्द्रीय नेतृत्वसँग सहकार्य र समन्वय गर्दै मन्त्रिपरिषद विस्तार गरेका हुन्। नयाँ मन्त्रीहरूमा आर्थिक मामिला तथा योजनामन्त्री प्रभातकुमार तामाङ, सामाजिक विकासमन्त्री कञ्चनचन्द्र बादे, सहकारी तथा गरिबी निवारणमन्त्री बिनु रायमाझी, संस्कृति तथा पर्यटनमन्त्री सुरेश श्रेष्ठ र युवा तथा खेलकुद मन्त्री उर्मिला केसी रहेका छन्।

मुख्यमन्त्री बानियाँले आन्तरिक मामिला तथा कानुन मन्त्रालयको जिम्मेवारी शिवराज अधिकारीलाई प्रदान गरेका छन्। यसअघि एमाले कोटाबाट छ जना मन्त्रीलाई नियुक्त गरी शपथ गराइसकेका थिए।

पूर्वमुख्यमन्त्री बहादुरसिंह लामाविरुद्ध कांग्रेस संसदीय दलमा अविश्वासको प्रस्ताव दर्ता भएपछि बानियाँ कांग्रेस नेतामा निर्वाचित भई मुख्यमन्त्री बनेका हुन्। बागमती प्रदेशमा मुख्यमन्त्रीसहित १४ वटा मन्त्रालय रहेका छन्।