हेटौंडा, बागमती प्रदेशका मुख्यमन्त्री इन्द्रबहादुर बानियाँले उपभोक्ता समितिमार्फत हुने काममा विकृति बढेको भन्दै अब प्रदेशका १० लाख रुपैयाँभन्दा माथिका सबै योजना टेन्डर प्रक्रियाबाट अघि बढाइने बताएका छन् ।
सोमबार निर्माण व्यवसायी सङ्घ मकवानपुरले आयोजना गरेको बधाई तथा शुभकामना कार्यक्रममा बोल्दै उनले संसदबाट निर्णय पारित भइसकेकाले मन्त्रालयहरूलाई टेन्डर प्रक्रिया अघि बढाउन निर्देशन दिइसकेको जानकारी दिए ।
मुख्यमन्त्री बानियाँले निर्माण व्यवसायीहरू अत्यधिक कम मूल्य (लो बिडिङ) राख्नुपर्ने बाध्यताले आर्थिक सङ्कटमा परेको भन्दै सार्वजनिक खरिद ऐन संशोधन अपरिहार्य भएको बताए । ‘६०/७० प्रतिशतसम्म घटाएर ठेक्का हाल्नुपर्ने बाध्यता व्यवसायीलाई कङ्गाल बनाउने अवस्थासम्म पुगेको छ । यसलाई रोक्न ‘एभरेज बिडिङ’ प्रणाली ल्याउनेतर्फ सरकार अग्रसर छ,’ उनले स्पष्ट पारे ।
उनले आफ्नो स्वामित्वमा रहेको बानियाँ निर्माण सेवा परिवारका सदस्यको नाममा नामसारी गरिसकेको उल्लेख गर्दै स्वार्थको द्वन्द्व अन्त्य गर्ने प्रयासमा लागेको बताए । ‘भ्रष्टाचारमुक्त बागमती प्रदेश बनाउने मेरो अभियानमा सबैको साथ चाहिन्छ,’ मुख्यमन्त्री बानियाँले भने ।
वार्षिक तीन अर्बभन्दा बढी कारोबार गर्ने कम्पनीबाट पूर्ण रूपमा अलग भइसकेको उल्लेख गर्दै उनले अब आम नागरिकको समस्या समाधानमा मात्र केन्द्रित हुने बताए । उनले निर्माण व्यवसायीहरूलाई गुणस्तरमा सम्झौता नगरी पारदर्शी काम गर्न आग्रह गर्दै चेतावनी दिए– ‘ठेक्कामा हिजो ८ वटा रड हाल्ने ठाउँमा ६ वटा हाल्ने दिन सकियो । अब प्रविधिले सबै कुरा देखाउँछ । इस्टिमेटअनुसार काम नगर्ने कर्मचारी वा व्यवसायी दुवै कारबाहीको दायरामा आउनेछन् । व्यवसायीलाई ढिलाइ गरिँदैन, तर काम गुणस्तरीय र पारदर्शी हुनुपर्छ ।’
