तेस्रो संस्करणको चैनपुर जेसीज मनहरी कप फुटबल प्रतियोगिता हुँदै

हेटौँडा, पश्चिम मकवानपुरमा सक्रिय संस्था चैनपुर जेसीज मनहरीको आयोजनामा तेस्रो संस्करणको चैनपुर जेसीज मनहरी कप खुला फुटबल प्रतियोगिता हुने भएको छ। जेसीजले यही असोज २३ गतेदेखि कार्तिक १ गतेसम्म प्रतियोगिता सञ्चालन गर्ने तयारी गरेको जनाएको छ।

जेसीजका अध्यक्ष कृष्णप्रसाद ढकालका अनुसार प्रतियोगिताको सम्पूर्ण तयारीलाई तीव्र पारिएको छ। उनका अनुसार विजेताले नगद १ लाख १ हजार १११, उपविजेताले नगद ५१ हजार १५१ सहित ट्रफी, मेडल र प्रमाणपत्र प्राप्त गर्नेछन्। त्यस्तै, प्रतियोगिताको सर्वोत्कृष्ट खेलाडीलाई नगद १० हजार र अन्य विधागत उत्कृष्ट खेलाडीलाई जनही नगद ५ हजार सहित ट्रफी र प्रमाणपत्र प्रदान गरिनेछ।

प्रतियोगितामा सहभागी हुन इच्छुक टिमले असोज २१ गतेसम्म दर्ता गराउनुपर्नेछ। टिम दर्ता शुल्क ७ हजार ५०० रुपैयाँ तोकिएको छ। अध्यक्ष ढकालले भने, ‘चैनपुर जेसीज मनहरीले स्थापनाकालदेखि नै जेसीज कप फुटबल प्रतियोगिता आयोजना गर्दै आएको छ। फुटबल खेलको विकास र युवाबीच भ्रातृत्वको सम्बन्ध विस्तार गर्न प्रतियोगितालाई निरन्तरता दिइएको हो।’
यसअघि दोस्रो संस्करणको उपाधि मकवानपुरगढी जेसीआईले जितेको थियो भने पहिलो संस्करणमा बागमती प्रदेश प्रहरी गण हेटौँडा विजेता बनेको थियो।