हेटौँडा, हेटौँडा–३ मा रहेको सहारा ग्यास इण्डस्ट्रिज प्रालिले गुणस्तरमा कमी आएका ७ सयभन्दा बढी ग्यास सिलिन्डर नष्ट गरेको छ। म्याद गुज्रिएका तथा हाइड्रोलिक परीक्षणमा फेल भएका ७ सय ३६ थान सिलिन्डर शुक्रबार नष्ट गरिएको हो।
ADVERTISEMENT
नेपाल आयल निगम वीरगञ्ज शाखा प्रमुख, गुणस्तर तथा नापतौल विभाग, हेटौंडा उपमहानगरपालिका–३ का वडाध्यक्ष ढलकबहादुर थापा, नेपाल ग्यास व्यवसायी महासंघ बागमती प्रदेशका अध्यक्ष विनोदमान श्रेष्ठ, घरेलु तथा साना उद्योग संघ, मकवानपुर ग्यास व्यवसायी संघ, उपभोक्ता हित संरक्षण मञ्च, नेपाल पत्रकार महासंघ मकवानपुर तथा सञ्चारकर्मीहरूको रोहबरमा ती सिलिन्डरहरू नष्ट गरिएको उद्योगले जनाएको छ।
उपभोक्ताले प्रयोग गरेपछि गुणस्तर खस्किएका सिलिन्डरहरू सुरक्षित ढंगबाट नष्ट गरिएको बताउँदै उद्योगले उपभोक्ता सुरक्षालाई उच्च प्राथमिकता दिइएको जनाएको छ। उद्योगका प्रबन्धक खडगबहादुर थापाका अनुसार प्रयोगमा रहेका केही सिलिन्डरहरूमा लिकेज, प्वाल परेको, नेकरिङ बिग्रिएको तथा म्याद सकिन लागेका अवस्था फेला परेपछि ती सिलिन्डर नष्ट गरिएको हो।
‘विगत १० देखि १२ वर्षसम्म हाइड्रोलिक परीक्षणमा फेल भएका सिलिन्डरहरू नष्ट गरेका हौँ,’ थापाले भने, ‘पुराना सिलिन्डर नष्ट गर्नुको उद्देश्य उपभोक्तालाई गुणस्तरीय र सुरक्षित सिलिन्डर उपलब्ध गराउनु हो।’
यसअघि पनि यस्ता सिलिन्डरहरू नियमित रूपमा नष्ट गरिँदै आएको र उपभोक्ताको सुरक्षाका लागि आगामी दिनमा पनि सिलिन्डर परीक्षणलाई निरन्तरता दिइने प्रबन्धक थापाले जानकारी दिए। उद्योगले हाल दैनिक करिब २ हजार ८ सय सिलिन्डर बजारमा बिक्री गर्दै आइरहेको जनाएको छ।
