हेटौँडा, हेटौँडा–४ स्थित नवोदय शिशु सदन अङ्ग्रेजी माध्यमिक विद्यालयले यही जेठ १५ गतेदेखि १७ गतेसम्म पाचौँ संस्करणको ‘नवोदय नमुना संयुक्त राष्ट्र संघ (नवोदय मुन–२०८३)’ आयोजना गर्ने भएको छ । मङ्गलबार पत्रकार सम्मेलनको आयोजना गरी आयोजकले नवोदय मुनको बारेमा जानकारी गराएको हो ।
ADVERTISEMENT
विद्यालयले विद्यार्थीमा नेतृत्व विकास, व्यक्तित्व विकास, समालोचनात्मक सोच, वादविवाद क्षमता तथा अन्तर्राष्ट्रिय विषयप्रतिको बुझाइ अभिवृद्धि गर्ने उद्देश्यले कार्यक्रमलाई निरन्तरता दिँदै आएको जनाएको छ । नवोदय नमुना संयुक्त राष्ट्र परिषद्का महासचिव वृष्टि जयसवालका अनुसार विद्यार्थीलाई गतिविधिमा आधारित शिक्षामार्फत आफ्ना विचार र धारणालाई प्रभावकारी रूपमा प्रस्तुत गर्न सक्षम बनाउने, सहकार्यको भावना विकास गर्ने तथा विश्वव्यापी मुद्दाबारे गहिरो अध्ययन र विश्लेषण गर्ने अवसर प्रदान गर्ने उद्देश्यले कार्यक्रम आयोजना गरिएको हो ।
हरेक वर्ष आयोजना हुँदै आएको यो कार्यक्रम संयुक्त राष्ट्रसंघको वास्तविक कार्यशैलीलाई आधार मानेर सञ्चालन गरिन्छ । कार्यक्रममा सहभागी विद्यार्थीहरूले विभिन्न राष्ट्रका प्रतिनिधिको भूमिका निर्वाह गर्दै आफ्नो देशको पक्षबाट विश्वव्यापी मुद्दामा बहस, छलफल तथा समाधानका उपाय प्रस्तुत गर्नेछन् । नवोदय मुन अन्तर्गत अन्तर्राष्ट्रिय श्रम संगठनमा ‘डिजिटल युगमा श्रमको नैतिक अभ्यास र आर्थिक समानता प्रवर्द्धन’, संयुक्त राष्ट्र पर्यावरण कार्यक्रममा ‘पर्यावरणीय सुशासन र दिगोपन सुनिश्चित गर्न विश्वव्यापी सहकार्य सुदृढीकरण’, संयुक्त राष्ट्र मानव अधिकार परिषदमा ‘युद्ध अपराध तथा मानवताविरुद्धका अपराधसम्बन्धी अन्तर्राष्ट्रिय मानवीय कानुन र जवाफदेहिता सुदृढीकरण’ तथा प्रतिनिधि सभामा ‘नेपालमा लोकतान्त्रिक अधिकारको सुरक्षाका लागि समुदायको नेतृत्वमा शान्ति र वातावरण संरक्षणको सुदृढीकरण’ विषयमा बहस हुनेछ ।
ADVERTISEMENT
तीन दिने कार्यक्रमअन्तर्गत दोस्रो दिन सहभागीहरूका लागि ‘सोसल नाइट’ तथा मनकामना डाँडा भ्रमण समेत आयोजना गरिएको विद्यालयले जनाएको छ । नवोदय मुन कार्यक्रममा आयोजक विद्यालयसहित हेटौँडा उपमहानगरपालिकाका ६ विद्यालय, चितवन, नवलपरासी, काठमाडौं, सर्लाही, कास्की र धरानलगायतका जिल्लाबाट पनि विद्यार्थीहरूको सहभागिता रहने जनाइएको छ । कार्यक्रममा कक्षा ८ देखि १० सम्म अध्ययनरत करिब २०० जना विद्यार्थी सहभागी हुने अपेक्षा गरिएको छ । जिल्लाभित्रका सहभागीका लागि २ हजार रुपैयाँ र जिल्लाबाहिरका लागि ६ हजार रुपैयाँ दर्ता शुल्क निर्धारण गरिएको विद्यालयले जनाएको छ । वि.सं. २०८२ को एसईई परीक्षामा सहभागी भएका विद्यार्थीहरू मुन कमिटीमा आबद्ध रहेका छन् ।
