हेटौँडा उपमहानगरपालिकाद्वारा कक्षा ११ र १२ का लागि छात्रवृत्ति आवेदन खुला

हेटौँडा, हेटौँडा उपमहानगरपालिकाले नगरभित्रका विद्यार्थीलाई माध्यमिक तहको शिक्षामा सहज पहुँच सुनिश्चित गर्न कक्षा ११ र १२ का लागि छात्रवृत्ति आवेदन खुला गरेको छ। उपमहानगरपालिकाको शिक्षा विकास महाशाखाका अनुसार नगरभित्र रहेका सामुदायिक तथा संस्थागत विद्यालयहरूमा माध्यमिक तह (कक्षा ११ र १२) मा अध्ययन गर्न इच्छुक तथा योग्य विद्यार्थीलाई लक्षित गरी शैक्षिक सत्र २०८३र०८४ का लागि छात्रवृत्ति परीक्षा सञ्चालन गरिने भएको हो।

छात्रवृत्ति परीक्षामा सहभागी हुन इच्छुक विद्यार्थीले अनलाइन माध्यमबाट आवेदन फाराम भर्न सक्नेछन्। २०८२ सालको माध्यमिक शिक्षा परीक्षा (एसईई) मा सहभागी भई ग्रेड प्राप्त गरेका विद्यार्थीहरूले जेठ २० गतेदेखि २७ गतेसम्म अनलाइनमार्फत आवेदन दिन सक्ने व्यवस्था गरिएको शिक्षा विकास महाशाखाले जनाएको छ।

उपमहानगरपालिकाका अनुसार प्राप्त आवेदनका आधारमा छात्रवृत्ति परीक्षा सञ्चालन गरिनेछ र परीक्षामा उत्कृष्ट नतिजा हासिल गर्ने विद्यार्थीहरूलाई छात्रवृत्ति प्रदान गरिनेछ। उक्त कार्यक्रमले आर्थिक अवस्था कमजोर भएका तथा अध्ययनमा रुचि र क्षमता भएका विद्यार्थीलाई गुणस्तरीय शिक्षामा पहुँच विस्तार गर्न सहयोग पुग्ने विश्वास उपमहानगरपालिकाले लिएको छ। विद्यार्थी तथा अभिभावकलाई निर्धारित समयभित्र आवेदन प्रक्रिया पूरा गर्न समेत आग्रह गरिएको छ।