१३ दशमलव २३ प्रतिशत बालबालिकालाई फाइजर खोप लगाइदै

सुजन ढकाल हेटौंडा, ८ असार/मकवानपुरका ५ वर्षदेखि १२ वर्ष मुनिकालाई बाल बालिकालायई आज (बिहीबार)बाट कोरोना भाइरसविरुद्धको फाइजर खोप लगाइँदै छ । असार ९ गतेदेखि १५ गतेसम्म ५ देखि ११ वर्ष मुनिका ६१ हजार ७५ जना बालबालिकालाई फाइजर खोप लगाइने जनस्वास्थ्य कार्यालय मकवानपुरले जनाएको छ ।

मकवानपुरमा रहेका ४ लाख ६१ हजार ६ सय ४४ जनसङ्ख्या मध्ये १३ दशमलव २३ प्रतिशत बालबालिकालाई कोरोना भाइरस विरुद्धको फाइजर खोप लगाउन लागिएको जनस्वास्थ्य कार्यालय मकवानपुरका सूचना अधिकारी लक्ष्मण घिमिरेले जानकारी दिए । मकवानपुरको १० वटै स्थानीय तहमा फाइजर खोप लगाइने छ । खोपका लागि जिल्लाका सबै स्वास्थ्यकर्मीहरूलाई तालिम दिइएको उनले जानकारी दिए । ‘बालबालिका पढ्ने विद्यालयमा खोप लगाइदै छ । खोप लगाउन छुट्नु भएका विद्यार्थीले नजिकैको स्वास्थ्य चौकीमा सम्पर्क गरी खोप लगाउन सक्नेछन्’, घिमिरेले भने ।

मकवानपुरमा ३९० जना स्वाथ्यकर्मीलाई तालिम दिई खोपको लागि परिचालन गरिएको छ । पहिलो खोप लगाएको २१ दिनदेखि २८ दिनपछि दोस्रो मात्राको खोप लगाइनेछ । कार्यालयको तथ्यांक अनुसार हेटौंडा उपमहानगरपालिकामा २५ हजार ९४९ जना, थाहा नगरपालिकामा ५ हजार १८७ जना, बागमती गाउँपालिकामा ४ हजार ५९ जना, बकैया गाउँपालिकामा ५ हजार ३९० जना, भीमफेदीमा २ हजार ८६४ जना, इन्द्रसरोवरमा १ हजार ८२२ जना बालबालिकालाई फाइजर खोप लगाइने छ ।

त्यसैगरी कैलाश गाउँपालिकामा २ हजार ९१६ जना, मकवानपुरगढीमा ३ हजार २१३ जना, राक्सिराङ गाउँपालिकामा ३ हजार ४३० जना र मनहरीमा ६ हजार २४५ जना बालबालिकालाई फाइजर खोप लगाइने स्वास्थ्य कार्यालयले जनाएको छ ।